ԵՐԵՎԱՆ, 10 օգոստոսի – Sputnik. Ծնվել է արցախյան 44-օրյա պատերազմում հերոսաբար զոհված Արծրուն Ատոմի Հակոբյանի եղբայրը։ Տեղեկությունը հայտնում է Կոտայքի մարզի Նաիրիի համայնքապետարանը։
Փոքրիկին անվանակոչել են եղբոր անունով` Արծրուն։
Ավագ սերժանտ Արծրուն Հակոբյանը ծնվել էր 2001 թ.–ին, 2020 թ.–ի հունվարին զորակոչվել էր պարտադիր զինվորական ծառայության։ Արցախյան 44-օրյա պատերազմի առաջին իսկ օրերից եղել է մարտի դաշտում։ Հադրութում ծանր մարտեր հաղթահարելուց հետո նոյեմբերի 5-ին տեղափոխվել է Շուշի և զոհվել այնտեղ։ Արծրուն Հակոբյանի աճյունը ծնողներին է հանձնվել նրա զոհվելուց մոտ 20 օր անց՝ նոյեմբերի 26-ին։ Հետմահու արժանացել է «Արիության» մեդալի։