ԵՐԵՎԱՆ, 9 օգոստոսի – Sputnik. Թուրքիայի հետախուզական ծառայությունները հայտարարել են ենթադրյալ «իրանական լրտեսական ցանցի» բացահայտման մասին։ Ձերբակալվածների թվում նաև ադրբեջանցիներ կան։ Ինչպես հաղորդում են տեղական ԶԼՄ-ները, Ստամբուլի օդանավակայանում իրականացված գործողության ընթացքում ուժայիններն առգրավել են տվյալների բազա, որը պարունակում է «Իսլամական պետություն» ահաբեկչական կազմակերպության շուրջ 10 հազար անդամների անուններ։
Ահաբեկիչների մասին կենսագրական տվյալներով բազայի գոյության մասին հայտնի է եղել մի շարք հատուկ ծառայությունների` Կենտրոնական հետախուզական վարչությունից մինչև բրիտանական ՄԻ–6 և իսրայելական «Մոսադ»։
Իրավապահները ԻՊ–ի հետ կապված լրտեսական օբյեկտների գաղտնալսման ընթացքում իմացել են առաջիկայում տվյալների փոխանակման մասին։ Նշվում է, որ տվյալների բազա ունեցող ահաբեկչական կազմակերպության անդամները պայմանավորվել են այն 9 մլն դոլարով վաճառել 5 տղամարդու` չկասկածելով իրանական հետախուզության հետ նրանց կապի մասին։ «Գնորդների» շրջանում նաև 2 ադրբեջանցի է եղել` Սեյմուր Ռզաևը, որը ծնվել է Իրանում, բայց Ադրբեջանի քաղաքացի է, և Հիքմեթ Ալիևը, որն Իրանի քաղաքացի է, ղեկավարում է մի ընկերություն, որը զբաղվում է Թուրքիայի և թյուրքական երկրների միջև բեռնափոխադրումներով։
Նշենք, որ վերջին ամիսներին Ադրբեջանում պարբերաբար հայտարարում են հերթական «լրտեսական ցանցի» բացահայտման մասին, որոնք իբր կառավարվում են Իրանի կողմից։