ԵՐԵՎԱՆ, 9 օգոստոսի – Sputnik. ԱՄՆ–ի Լոս Անջելեսի շրջանի Բըրբանքի քաղաքապետ Կոնստանտին Էնթոնին հանդիպման է եկել կոնգրեսական Ադամ Շիֆի տան մոտ նստացույց անող հայերի հետ։ Նրանք Էնթոնիին ներկայացրին իրենց պահանջները և ասացին, որ մնալու են այդտեղ, մինչև Շիֆը չիջնի ու չխոսի իրենց հետ։
Նշենք, որ ակցիայի մասնակիցները մինչ այս, 3 օր նստացույց էին անում Շիֆի գրասենյակի առաջ` կոչ անելով նրան մեկնել Հայաստան` Կոռնիձոր, այնուհետև գնալ նաև Լաչինի միջանցք` տեղում ծանոթանալու իրավիճակին։ Ակցիայի մասնակիցները շարունակում են պահանջել բացել Արցախի կյանքի ճանապարհը` Լաչինի միջանցքը:
«Մենք ուզում ենք, որ նա իջնի, դա կարևոր է։ Դուք մեզ այստեղ ամեն օր կտեսնեք, անգամ կհոգնեք մեզնից։ Բայց մենք այստեղ ենք մնալու, պայքարելու ենք, որովհետև 120.000 մարդ շրջափակման մեջ է, նրանք մեր բոլորի օգնության կարիքն ունեն»,– նշում են ամերիկահայերը` ներկայացնելով Էնթոնիին Լաչինի միջանցքի փակ լինելու պատճառով Արցախում տիրող իրավիճակը։
Բըրբանքի քաղաքապետը զարմացավ` լսելով, թե իրավիճակ է Արցախում` որ մարդիկ մահանում են շրջափակման հետևանքով, երեխաներն ուշագնաց լինում սովի պատճառով։ Նա ափսոսանք հայտնեց, որ ԱՄՆ–ն Ադրբեջանին օգնություն է ուղարկում։
«Մտահոգված եմ Արցախի հարցով և հիասթափված, որ ԱՄՆ նախագահ Ջո Բայդենը ռազմական օգնություն է ուղարկում Ադրբեջանին»,– նշեց Էնթոնին։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին ավելի քան 225 օր շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։