ԵՐԵՎԱՆ, 8 օգոստոսի – Sputnik. Աթենքի Նեա- Ֆիլադելֆիա շրջանում զանգվածային ծեծկռտուք է տեղի ունեցել հունական ԱԵԿ-ի և Զագրեբի «Դինամոյի» երկրպագուների միջև, մեկ մարդ մահացել է, ութը՝ վիրավորվել, հաղորդում է հունական ERT հեռուստաընկերությունը։
Զագրեբի «Դինամոյի» երկրպագուները հայտնվել են Հունաստանում՝ չնայած ՈւԵՖԱ-ի կողմից ԱԵԿ-ի դեմ խաղին նրանց ներկայության արգելքին։
Ըստ տեղեկությունների՝ «Դինամոյի» 150-200– հոգանոց խումբը ավտոմեքենայով ժամանել է Հունաստան։
«Զոհված երկրպագուն և ութ վիրավորները Նեա Ֆիլադելֆիայում Զագրեբի «Դինամոյի» խուլիգանների կողմից երեկ երեկոյան տեղի ունեցած արյունալի դեպքի ողբերգական վկայությունն են։ 22-ամյա երկրպագուն դանակի բազմաթիվ հարվածներ է ստացել և արդյունքում մահացել։ Տուժածների թվում կան նաև անչափահասներ՝ գլխի վնասվածքներով, որոնք ստացել են քարերով հարվածների հետևանքով»,- նշված է հաղորդագրության մեջ։
Ոստիկանությունը բերման է ենթարկել 96 մարդու, որոնցից 88-ը գտնվում են Ատտիկայի ոստիկանության գլխավոր վարչությունում։ Ութ վիրավոր հիվանդանոցում է։
«Ձերբակալվածների թվում կա 82 խորվաթ, մեկ ավստրիացի, մեկ բոսնիացի, մեկ ալբանացի, մեկ գերմանացի և երկու հույն»,- նշված է հաղորդագրության մեջ։
Խորվաթների խուլիգանոթյունների հետևանքով վնասվել են բազմաթիվ խանութների ցուցափեղկեր ու մեքենաներ, նրանք ավտոկայանատեղիի մոտ այրել են աղբամաններն ու ճյուղերը, ջարդել մեքենաների դիմապակիներ։