ԵՐԵՎԱՆ, 8 օգոստոսի – Sputnik. Արցախյան պատերազմի մասնակիցները, որոնք առավոտից բողոքի ակցիա են անում ՀՀ կառավարության շենքի մոտ, որոշել են փակել Հանրապետության հրապարակ տանող բոլոր ճանապարհները:
«Խաչակիր» ջոկատի անդամներն ու նրանց աջակիցները պահանջում են իշխանությունից քայլեր ձեռնարկել Լաչինի միջանցքի ապաշրջափակման և Լեռնային Ղարաբաղում հումանիտար աղետի դադարեցման ուղղությամբ։
Նրանք պահանջում են իրենց զինել Լաչինի միջանցքն ուժով ապաշրջափակելու համար։
«Մենք թույլ չենք տա, որ մեզ անտեսեն։ Նրանք պետք է հասկանան, որ մենք լուրջ ենք տրամադրված», – հայտարարեց «Խաչակիրներ» ջոկատի հրամանատար, պահեստազորի գնդապետ Սարգիս Պողոսյանը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տոննա ապրանքով բեռնված 19 բեռնատար Երևանից ուղևորվեցին ավելի քան 225 օր շրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։