ԵՐԵՎԱՆ, 8 օգոստոսի – Sputnik. Օրեր առաջ «Ակվատեկ» մարզաառողջարանային համալիրում տեղի ունեցած միջադեպի պատճառը ոչ թե հաշմանդամություն ունեցող անձանց նկատմամբ խտրական վերաբերմունքն է, այլ ընկերությանը պատկանող «Ակվատեկ» ժամանցի վայրի՝ հաշմանդամություն ունեցող անձանց համար մատչելի չլինելը, ինչը Հայաստանի Հանրապետությունում կրում է համընդհանուր բնույթ։ Այս մասին իր ֆեյսբուքյան էջում գրել է ՀՀ մարդու իրավունքների պաշտպան Անահիտ Մանասյանը` դեպքի առիթով ուսումնասիրություն կատարելուց հետո։
Հայտնել ենք, որ օրեր առաջ համացանցում տեղեկություն էր տարածվել, թե հաշմանդամություն ունեցող 8 երեխաների մուտքը «Ջրաշխարհ» խոչնդոտվել է։
Հանգամանքները պարզելու նպատակով ՄԻՊ ներկայացուցիչները կապ են հաստատել կողմերի հետ ու պարզել, որ հաշմանասմություն ունեցող երեխաերին ոչ թե թույլ չեն տվել մտնել «Ակվատեկ», այլ առաջարկել են օգտվել իրենց ընկերությանը պատկանող «Ջրաշխարհի» ծառայություններից, որն ի տարբերություն «Ակվատեկի»`մատչելի է հաշմանդամություն ունեցողների համար։ Սակայն Վանաձորից ժամանած խումբը հրաժարվել է«Ջրաշխարհի» ծառայություններից` հաշվի առնելով տարածքի բացօթյա լինելը և եղանակային պայմանները։
Վերջում մարդու իրավունքների պաշտպանն ընդգծել է, որ հաշմանդամություն ունեցող անձանց համար մատչելի միջավայրի ձևավորմանն ուղղված միջոցառումներն իր անմիջական ուշադրության կենտրոնում են, և որ իր ղեկավարած կառույցը շարունակում է իրականացնել այս ոլորտի օրենսդրական դաշտի և պրակտիկայի կատարելագործմանն ուղղված աշխատանքներ։