ԵՐԵՎԱՆ, 7 օգոստոսի – Sputnik. Վլադիմիր Զելենսկու գրասենյակի ղեկավարի խորհրդական Միխայիլ Պոդոլյակը հայտարարել է, որ Մոսկվայի հետ ոչ մի բանակցություն չի կարող լինել, և Կիևը դեմ է հրադադարի ցանկացած սցենարի: Նրա խոսքը մեջբերում է ՌԻԱ Նովոստին։
«Ուկրաինայում հրադադարի և պատերազմի սառեցման ցանկացած սցենար ներկայիս դիսպոզիցիայի պայմաններում միայն մեկ բան է նշանակելու` Ռուսաստանի փաստացի հաղթանակ… դա կլինի արևմտյան աշխարհի մեծ պարտությունը և գոյություն ունեցող գլոբալ անվտանգության կարգի ավարտը»,- ասել է Պոդոլյակը:
Նա հավելել է, որ ստատուս քվոն պետք է փոխվի ռազմի դաշտում։
«Ուրեմն… ավելի շատ զենք, հրթիռներ և ինքնաթիռներ»,- ընդգծել է Պոդոլյակը։
Մոսկվան բազմիցս ասել է, որ պատրաստ է բանակցությունների, սակայն Կիևը օրենսդրական մակարդակով արգելել է դրանք։ Արևմուտքը ՌԴ-ին մշտապես բանակցությունների կոչ է անում, Մոսկվան պատրաստակամություն է դրսևորում, բայց միևնույն ժամանակ Արևմուտքում անտեսում են Կիևի մշտական մերժումները։
Ավելի վաղ Կրեմլում հայտարարել էին, որ Ռուսաստանի համար բացարձակ առաջնահերթությունը հատուկ գործողության նպատակներին հասնելն է, այս պահին դա հնարավոր է միայն ռազմական ճանապարհով, ՌԴ-ն բարձր է գնահատում բոլոր երկրների ջանքերը, որոնք փորձում են խաղաղ հուն տեղափոխել Ուկրաինայի հակամարտության լուծումը, սակայն առայժմ դա անհնար է։
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են մինչ օրս։