ԵՐԵՎԱՆ, 6 օգոստոսի - Sputnik. Ստամբուլում ընթացող աշխարհի պատանեկան առաջնությունում հայ ըմբիշները ևս երկու մեդալ են նվաճել։ Տեղեկությունը հայտնում է Հայաստանի ըմբշամարտի ֆեդերացիան։
45 կգ քաշային ազատ ոճի ըմբիշ Գոռ Բունիաթյանը պարտություն է կրել եզրափակիչ գոտեմարտում։ Նա զիջել իրանցի ըմբիշ Ահորա Ֆարհադ Խաթերին ու բավարարվել արծաթե մեդալով։ Իսկ 51 կգ քաշային Սաշա Պետրոսյանը հաղթել է մեկ այլ իրանցի մարզիկի սփոփիչ գոտեմարտում ու վաստակել է բրոնզե մեդալ։
Ավելի վաղ հայտնել էինք, որ բրոնզե մեդալակիր են դարձել ազատ ոճի ըմբիշներ Սամվել Գևորգյանն (55 կգ) ու Հենրիկ Հայկյանը (110 կգ)։
Նշենք, որ Հայաստանի Հունահռոմեական ոճի ըմբշամարտի պատանեկան հավաքականում իրենց ուժերն են չափում Յուրիկ Մխիթարյանը (45 կգ), Էդգար Պետրոսյանը (48 կգ), Արթուր Բրոյանը (51 կգ), Յուրի Կարապետյանը (55 կգ), Սամվել Տերտերյանը (60 կգ), Պետրոս Աշկարյանը (65 կգ), Գոռ Խաչատրյանը (71 կգ), Էրիկ Տեր-Մաթևոսյանը (80 կգ) և Գրիշա Ոսկանյանը (92 կգ):
Իսկ ազատ ոճի ըմբշամարտի պատանեկան հավաքականի կազմում ԱԱ-ին կմասնակցեն Գոռ Բունիաթյանը (45 կգ), Միհրան Սլոյանը (48 կգ), Սաշա Պետրոսյանը (51 կգ), Սամվել Գևորգյանը (55 կգ), Արեն Հայրապետյանը (60 կգ), Վլադիմիր Ազարյանը (65 կգ), Նարեկ Նիկողոսյանը (71 կգ), Ռազմիկ Եփրեմյանը (80 կգ), Վարուժան Հովհաննիսյանը (92 կգ) և Հենրիկ Հայկյանը (110 կգ):