ԵՐԵՎԱՆ, 5 օգոստոսի – Sputnik. Հայաստանի Հանրապետության մոտ 600.000 քաղաքացիներ, որոնք գրանցված չեն ՀՀ տարածքում, օգտվում են ընտրական իրավունքից, «ՀայաՔվե» նախաձեռնության առաջին փուլում զրկված են եղել իրենց սահմանադրական իրավունքից։ Այսօր ասուլիսի ժամանակ տեղեկությունը հայտնեց նախաձեռնության համակարգող Ավետիք Չալաբյանը` անդրադառնալով չլուծված խնդիրներին։
Նա նշեց, որ երեկ` հուլիսի 4–ին,Կենտրոնական ընտրական հանձնաժողով են դիմել ամենամեծ խնդիրներից մեկի հետ կապված, այն է` ՀՀ քաղաքացիները նույնականացման քարտով չեն կարողանում ստորագրել և միանալ «ՀայաՔվե» նախաձեռնությանը։
«Մենք ճշտումներ ենք արել, պարզվել է, որ դա ոչ թե ԿԸՀ–ի կայքի խնդիրն է, այլ կայքը սպասարկելու»,–ասաց Չալաբյանը` բացատրելով, որ «ՀայաՔվե» նախաձեռնությանը միանալու համար չկա օրենքի պահանջ, որ անձը պարտադիր պետք է ՀՀ տարածքում գրանցում ունենա։
Չալաբյանն ընդգծեց, որ ՀՀ–ն փաստացի ունի մոտ 2.6 մլն քաղաքացի, որից 600000–ը փաստացի գրանցված չէ և բնակվում է այլ երկրներում։
Նրա խոսքով` եթե այդ սխալը չշտկվի նախաձեռնության հաջորդ փուլերի համար և ԿԸՀ–ը շարունակի խուսափել այդ խնդրին լուծում տալուց, իրենք կդիմեն Սահմանադրական դատարան։
Հիշեցնենք` հունիսի 20-ին հայտնի դարձավ, որ ՀՀ կենտրոնական ընտրական հանձնաժողովը բավարարել է «ՀայաՔվե» նախաձեռնության դիմումը` 50 հազար ստորագրություն հավաքելու և Ազգային ժողով օրենսդրական նախաձեռնություն ներկայացնելու համար։
Նախաձեռնության անդամները ցանկանում են հանրաքվեի միջոցով Լեռնային Ղարաբաղի ինքնորոշումից հրաժարվելու և Հայոց ցեղասպանության նշանակությունը նսեմացնելու համար օրենքով խիստ պատիժ նախատեսել։
Ստորագրահավաքի համար սահմանվել էր 60-օրյա ժամկետ՝ 2023 թվականի հունիսի 21-ից օգոստոսի 19-ը։ Հուլիսի 29–ին նախաձեռնության հեղինակները հայտնեցին, որ «ՀայաՔվե» նախաձեռնությանն արդեն միացել է 54 հազար 800 քաղաքացի, սակայն ստորագրահավաքը կշարունակվի ևս մեկ շաբաթ, որպեսզի դրան մասնակցել կարողանանան բոլոր ցանկացողները։ Օգոստոսի 5–ին «ՀայաՔվեի» ստորագրահավաքն ավարտվեց. դրան մասնակցել է ավելի քան 58 հազար քաղաքացի։