ԵՐԵՎԱՆ, 4 օգոստոսի – Sputnik. ՊԲ N զորամասի հրաձգային վաշտի հրամանատար Վ.Հ.-ն,2020 թվականի նոյեմբերի 2-ին չունենալով զբաղեցված մարտական դիրքերից նահանջելու վերաբերյալ ավագ պետի հրամանը կամ թույլտվությունը, հակառակորդի առաջխաղացումը կասեցնելու փոխարեն մարտական դիրքի անձնակազմին անհիմն հրամայել է նահանջել։ Տեղեկությունը հայտնում է ՀՀ գլխավոր դատախազության մամուլի ծառայությունը։ Այս ամենի հետևանքով մարտական գործողությունների ժամանակ անձնակազմը լքել է մարտական դիրքերը:
Դրանից հետո Վ.Հ.-ն, «ձախ ծնկան հոդի շրջանի փափուկ հյուսվածքների սալջարդի, քերծվածքի, այտուցի ձևով» մարմնական վնասվածք ստացած լինելու պատրվակով դիմել է բուժօգնության և մի քանի օրով ազատվել ծառայողական պարտականությունների կատարումից:
Ապաքինվելուց հետո, երբ նոյեմբերի 5-ի լույս 6-ի գիշերը Վ.Հ.-ն իմացել է, որ վաշտի անձնակազմի հետ մեկնելու է մարտական առաջադրանք կատարելու, փորձել է համոզել սերժանտ Ա.Մ.-ին՝ արհեստական եղանակով վնաս պատճառել իր առողջությանը։ Սերժանտ Ա.Մ.-ն մերժել է, դրանից հետո Վ.Հ.-ն որոշել է ինքնուրույն անդամախեղում կատարել:
Նոյեմբերի 6-ին, դեպի մարտական դիրքեր տանող ճանապարհով ընթանալու ժամանակ, Վ.Հ.-ն իրեն ամրակցված ինքնաձիգից կրակել է իր աջ ազդրին՝ առողջությանը պատճառելով միջին ծանրության վնաս՝ առողջության տևական քայքայումով:
ՀՀ ՊԲ հրամանատարի 2021 թվականի փետրվարի 16-ի հրամանով՝ Վ.Հ.-ն ազատվել է զբաղեցրած պաշտոնից:
2023 թվականի հուլիսի 22-ին հսկող դատախազը հանրային քրեական հետապնդում է հարուցել Վ.Հ.-ի նկատմամբ։ Նա մեղադրվում է 2003 թվականին ընդունված Քրեական օրենսգրքի 364-րդ հոդվածի 3-րդ մասով (զինծառայողի կողմից զինվորական ծառայությունից կամ դրա առանձին պարտականությունները կատարելուց հրաժարվելը) և 363-րդ հոդվածի 5-րդ մասով (առողջությանը վնաս պատճառելու (անդամախեղելու), հիվանդության սիմուլյացիայի կամ ապօրինի այլ եղանակով զինվորական ծառայությունից խուսափելը կամ դրա առանձին պարտականությունների կատարումը դադարեցնելը):
Օգոստոսի 1-ին դատախազը քրեական վարույթի նյութերը մեղադրական եզրակացությամբ ուղակել է Սյունիքի մարզի առաջին ատյանի ընդհանուր իրավասության քրեական դատարան: