ԵՐԵՎԱՆ, 3 օգոստոսի - Sputnik. Այսօր տեղի է ունեցել «Քաղաքացիական պայմանագիր» կուսակցության նախաձեռնող խմբի նիստ, որը վարել է վարչության նախագահ, ՀՀ վարչապետ Նիկոլ Փաշինյանը։
Տեղեկությունը հայտնում են կուսակցության գրասենյակից։
«Նիստի մասնակիցներին է ներկայացվել Երևանի ավագանու սպասվող ընտրություններում կուսակցության ընտրական ցուցակը։ Քննարկվել են ընտրություններին առնչվող կազմակերպչական բնույթի հարցեր,-նշված է հաղորդագրության մեջ։
Հիշեցնենք` Երևանի ավագանու ընտրությունները տեղի կունենան սեպտեմբերի 17-ին: «Քաղաքացիական պայմանագիր» կուսակցության քաղաքապետի թեկնածուն նախկին փոխվարչապետ, այժմ Երևանի փոխքաղաքապետ Տիգրան Ավինյանն է:
Ընտրություններին կմասնակցեն նաև «Լույս» խմբակցության ղեկավար Դավիթ Խաժակյանը, Երևանի Կենտրոն վարչական շրջանի նախկին ղեկավար Վիկտոր Մնացականյանը, ինչպես նաև «Ապրելու երկիր» կուսակցության նախագահ Մանե Թանդիլյանը։
Քաղաքապետի պաշտոնի համար կպայքարի նաև «Ազգային առաջընթաց» կուսակցությունը, որի ցուցակը կգլխավորի վարչության անդամ Հայկ Գրիգորյանը։
Երևանի քաղաքապետի պաշտոնին է հավակնում նաև ՀՀ արդարադատության նախկին նախարար, «Հանրապետություն» կուսակցության քաղխորհրդի անդամ Արտակ Զեյնալյանը։
Երևանի ավագանու ընտրություններին կմասնակցեն նաև «Հանուն սոցիալական արդարության» կուսակցությունը, «Ուժը Հայրենյաց» կուսակցությունը, որի ցուցակը կգլխավորի Նելլի Հարությունյանը։