ԵՐԵՎԱՆ, 1 օգոստոսի – Sputnik. ՀՀ զինված ուժերը չէին կարող չիրականացնել հուլիսյան գործողությունները: Զինված ուժերի գնահատականն էր, որ դա անհրաժեշտ է, դա մարտավարական խնդիր է։ ՀՀ ԱԺ 44-օրյա պատերազմի հանգամանքներն ուսումնասիրող քննիչ հանձնաժողովի այսօրվա նիստում հայտարարեց ՀՀ պաշտպանության նախկին նախարար Դավիթ Տոնոյանը։
«Կարելի է գնահատել, որ իրավիճակը սադրել ենք, կարող է մի քիչ հետաձգել կամ արագացրել ենք, բայց մենք իրավունք չունեինք այդ գործողությունը չիրականացնել»,– ասաց նա։
Նախկին պաշտպանության նախարարը վստահեցրեց, որ հուլիսյան գործողությունները եղել են որակական առումով ամենաբարձր մակարդակի։
Դավիթ Տոնոյանը բացատրեց նաև, թե ինչու են հուլիսյան դեպքերից հետո բազմաթիվ զինծառայողներ շքանշաններ ու պագևներ ստացել։
Նա հիշեցրեց, որ դրանից մի քանի ամիս առաջ ՀՀ– Ադրբեջան սահմանին գործողություններ են տեղի ունեցել, որոնք փոխկապակցված են եղել Հայաստանի էներգետիկ ապահովման անվտագության հետ։ Այդ գործողություններին մասնակցել են նույն զինծառայողները, ինչ հուլիսյան դեպքերին, բայց առաջին անգամ նրանց սխրանքները չեն բարձրաձայնվել` գործողությունների գաղտնիության պատճառով։
Հիշեցնենք, որ 2020 թ.–ի հուլիսի 12–ից իրավիճակը սրվել էր հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր էին արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել էին իրենց դիրքեր: Դրանից հետո հակառակորդը պարբերաբար վերսկսում էր գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 5 զոհ ունի, 36 վիրավոր։
Հուլիսյան մարտերից հետո Նիկոլ Փաշինյանը Սարդարապատում պարգևատրեց մի շարք զինծառայողների։
ՀՀ պատմության մեջ առաջին անգամ է, որ 16 զինծառայողներ պարգևատրվում են «Մարտական խաչ» առաջին աստիճանի, 55 զինծառայողներ՝ «Մարտական խաչ» երկրորդ աստիճանի շքանշանով։