ԵՐԵՎԱՆ, 1 օգոստոսի – Sputnik. Հայաստանի կենտրոնական բանկի խորհուրդը վերաֆինանսավորման տոկոսադրույքը նվազեցրեց 0,25 տոկոսային կետով` սահմանելով 10.25։ Տեղեկությունը լրագրողների հետ հանդիպմանը հայտնեց ԿԲ նախագահի տեղակալ Արմեն Նուրբեկյանը։
Նա նաև նշեց, որ հունիսին 12-ամսյա գնաճը շարունակել է արագորեն նվազել` կազմելով -0.5 տոկոս, իսկ 12-ամսյա բնականոն գնաճը նույնպես զգալիորեն դանդաղել է` կազմելով 1.5 տոկոս։
«Զսպող դրամավարկային քաղաքականության և դրամի արժևորման պայմաններում գնաճային միջավայրը ՀՀ–ում շարունակում է արագ տեմպերով մեղմվել։ Բացի այդ, 2023 թ. 2–րդ եռամսյակում համաշխարհային տնտեսությունում պահպանվել է ցածր տնտեսական ակտիվությունը, և 12-ամսյա գնաճը շարունակել է նվազել։ Կոշտ գներով աչքի ընկնող ծառայությունների և ապրանքների գները դեռևս շարունակում են մնալ բարձր։ Ուստի գործընկեր բանկերի ԿԲ–ները կշարունակեն վարել զսպող դրամավարկային քաղաքականություն»,– հայտարարեց Նուբարյանը։
Նրա խոսքով` միջազգային ապրանքահումքային շուկաներում գները նվազում են, որի արդյունքում ՀՀ տնտեսության վրա գնաճային ազդեցությունները ևս շարունակում են նվազել։
ԿԲ նախագահի տեղակալը նշեց, որ 2023 թ. 2–րդ եռամսյակում սպասվածից բարձր տնտեսական ակտիվություն է գրանցվել, որին շարունակել են նպաստել շինարարության և ծառայությունների ոլորտներում արձանագրված բարձր աճը։
Ըստ Նուբարյանի` կապիտալի, աշխատուժի և զբոսաշրջության մեծ ներհոսքի պայմաններում տնտեսությունում ավելացող եկամուտները նպաստել են այս ոլորտներում պահանջարկի ընդլայնմանը։
«Դրամավարկային քաղաքականության սցենարում նախանշված 12-ամսյա գնաճը կպահպանվի նպատակային ցուցանիշներից ցածր մակարդակում, աստիճանաբար կավելանա և միջնաժամկետում կկայունանա նպատակային 4 տոկոս ցուցանիշի շուրջ»,– վստահեցրեց Նուբարյանը։
Նա տեղեկացրեց նաև, որ գնաճային շեղման ռիսկերը հիմնականում հավասարակշռված են, և ռիսկերի ավելացման դեպքում ԿԲ–ն համարժեքորեն կարձագանքի և կապահովի գների կայունացում։
Հիշեցնենք, որ հունիսի 13–ին Հայաստանի կենտրոնական բանկը նվազեցրել էր վերաֆինանսավորման տոկոսադրույքը 0.25%-ով՝ 10.75%-ից հասցնելով 10.5%-ի: