ԵՐԵՎԱՆ, 31 հուլիսի – Sputnik. Վրաստանի Բաթում քաղաքում ընդդիմադիրների և հասարակական գործիչների մասնակցությամբ բողոքի ցույցեր են ընթանում հուլիսի 31-ի առավոտյան նավահանգիստ հասած զբոսանավի դեմ, որում ռուսաստանցիներ են եղել։ Երկրի իշխանությունները ընդդիմադիրների գործողությունները «անպատասխանատու» են որակել` նշելով, որ դրանք ուղղված են երկրի տնտեսական զարգացման դեմ։
«Astoria Grande» զբոսանավն առաջին անգամ Բաթում է հասել հուլիսի 27-ին, զբոսաշրջիկներին դիմավորել են բողոքի ցույցերով, երկրորդ անգամ` երկուշաբթի առավոտյան։ Հուլիսի 29-ին զբոսանավը դուրս է եկել Սոչիից (երթուղին` Սոչի–Տրաբզոն–Բաթում–Ամասրա–Ստամբուլ–Սոչի) և պետք է վերադառնա օգոստոսի 5-ին։
«Astoria Grande» զբոսանավը
© Sputnik / Stringer
Վրաստանի էկոնոմիկայի նախարարությունը հուլիսի 30-ին հայտարարել է, որ նավը Պալաուի դրոշով է լողում և պատժամիջոցների տակ չէ, այդ պատճառով իրավունք ունի մտնելու Վրաստանի (որն այդպիսով զարգացնում է ծովային զբոսաշրջությունը) նավահանգիստներ։ Սակայն դա չի օգնել, այդ իրադարձությունների ֆոնին Բաթումը հեռացվել է հետագա երթուղիների ցուցակից։
Փոխվարչապետ, էկոնոմիկայի և կայուն զարգացման նախարար Լևան Դավիթաշվիլին, այսօր մեկնաբանելով ռուսաստանցի զբոսաշրջիկներ տեղափոխող զբոսանավի շուրջ ստեղծված իրավիճակը, հայտարարել է, որ ընդդիմադիրները խոչընդոտում են Վրաստանում զբոսաշրջության զարգացումը։ Նրա խոսքով` ընդդիմությունը մոլորության մեջ է գցել երկրի բնակչությանը։
«Նրանց հաջողվում է երկրում ապակառուցողական գործողություններ իրականացնել և խոչընդոտել զբոսաշրջության զարգացումը, կայունության ապահովումը, ինչն անմիջականորեն խանգարում է տնտեսական բարեկեցությանը։ Դա նաև ուղղված է մեր քաղաքացիների և ընդհանուր առմամբ երկրի շահերի դեմ», – հայտարարել է Դավիթաշվիլին։
Միևնույն ժամանակ նա վստահեցրել է, որ Վրաստանի իշխանությունները նման բան թույլ չեն տա և հետևողական կլինեն երկրի տնտեսական զարգացման համար կայունության մթնոլորտ ապահովելու հարցում։
Վրաստանի արտգործնախարար Իլյա Դարչիաշվիլին էլ ակցիան անվանել է միտումնավոր սադրանք ընդդիմության կողմից, որի ապակառուցողական գործողություններն ուղղված են երկրի զբոսաշրջության զարգացման դեմ։
«Անհասկանալի է` ինչ տարբերություն` այցելուները ինքնաթիռով, թե նավով են ժամանում։ Սա բացահայտ, միտումնավոր սադրանք է մեր երկրի զբոսաշրջային զարգացումը խոչընդոտելու համար», – հայտարարել է Դարչիաշվիլին։
ԱԳՆ ղեկավարը քաղաքացիներին հորդորել է զերծ մնալ բողոքը նման եղանակով արտահայտելուց։ Միևնույն ժամանակ «Վրացական երազանք - ժողովրդավարական Վրաստան» իշխող կուսակցության գլխավոր քարտուղար Կախա Կալաձեն արձագանքել է Վրաստանում ԱՄՆ դեսպան Քելլի Դեգնանի հայտարարությանը, որն ասել էր, թե որևէ մեկը չպետք է ակնկալի, որ վրացիները ողջունելու են Ռուսաստանից ժամանած մարդկանց` հաշվի առնելով Վրաստանի տարածքային խնդիրները։
Կալաձեն նշել է, որ ցանկացած ազգության զբոսաշրջիկների ժամանումը դրական կանդրադառնա Վրաստանի տնտեսության վրա, կարևորը, որ բոլորը հարգեն Վրաստանի սահմանադրությունը։
«Վրաստանի դռները բաց են զբոսաշրջիկների համար։ Կարող են լինել ռուսներ, եվրոպացիներ, ամերիկացիներ։ Ես խնդիր չեմ տեսնում։ Թող գան, կարևորը` բոլորը հարգեն Վրաստանի սահմանադրությունն ու պահպանեն օրենքը։ Թող գումարներ ծախսեն, չէ՞ որ այդ գումարը Վրաստանի տնտեսություն է գնում։ Այդ բողոքն ուղղված է Վրաստանի դեմ։ Նրանց (ընդդիմությանը. խմբ.) հաճելի չէ, որ երկրում խաղաղություն է տիրում», – հայտարարել է Կալաձեն։
Նշենք, որ «Astoria Grande» զբոսանավը պլանավորում էր պարբերաբար մտնել սևծովյան Բաթում քաղաք։ Սակայն բողոքի ակցիաների ֆոնին այն ջնջվել է հետագա երթուղիների ցուցակից։ Նավի ուղևորների համար Վրաստանի վիզա հարկավոր չէ։