ԵՐԵՎԱՆ, 31 հուլիսի – Sputnik. Ադրբեջանցի սահմանապահների կողմից առևանգված Վագիֆ Խաչատրյանն ինքը չի ցանկացել հաղորդագրություն գրել, ուղարկել հարազատներին։ ՀՀ–ում ԿԽՄԿ պատվիրակության ղեկավար Թիերի Ռիբոյի հետ հանդիպումից հետո ճեպազրույցի ժամանակ այս մասին ասաց Վագիֆ Խաչատրյանի դուստրը` Վերա Խաչատրյանը։
Հայտնել ենք, որ Երևանում Կարմիր խաչի և ՄԱԿ–ի գրասենյակների մոտ այսօր վաղ առավոտից բողոքի ակցիաներ են տեղի ունենում ի պաշտպանություն ադրբեջանցիների կողմից առևանգված Վագիֆ Խաչատրյանի։ Վագիֆ Խաչատրյանի դուստրը` Վերա Խաչատրյանը, հայտարարել էր, որ իրենք` ընտանիքի անդամները, մինչ այս պահը չեն կարողացել կապ հաստատել հոր հետ։
«Իսկ այն, որ ասել էին, թե հարազատները կապ են հաստատել իր հետ, ասել եմ, որ կեղծ է, նման բան չկա։ Նրանք ասացին, որ այդ հաղորդագրությունը կջնջեն։ Միևնույն ժամանակ ասացին` ձեր հայրն է մերժել, չի ցանկացել հաղորդագրություն գրել, ուղարկել ձեզ»,– ասաց Վերա Խաչատրյանը։
ՀՀ–ում ԿԽՄԿ պատվիրակության ղեկավարի հետ հանդիպումից հետո Վագիֆ Խաչատրյանի դուստրը ակնկալիք չունի, որ կվերադարձնեն իր հորը. ԿԽՄԿ–ից ասել են, որ իրենց մանդատը թույլ է տալիս միայն տեսակցություններ կազմակերպել։
Վերա Խաչատրյանը ԿԽՄԿ–ից տեղեկացել է, որ միայն հուլիսի 29–ին են կոմիտեից այցելել իր հորը։
«Ասում են, որ շատ են ցավում կատարվածի համար։ Ասում են, որ Ադբեջանը համաձայնություն էր տվել, որ հայրը պետք է անցներ սահմանը, սակայն խախտել է խոստումը»,– պատմեց Վերա Խաչատրյանը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Անհետաձգելի բուժօգնության կարիք ունեցող բուժառուներն այս ընթացքում Արցախից Հայաստան են տեղափոխվում ԿԽՄԿ միջնորդությամբ և ուղեկցությամբ։ Նրանցից մեկին` Վագիֆ Խաչատրյանին, հուլիսի 29–ին առևանգել են Ադրբեջանի սահմանապահ ծառայության ներկայացուցիչները։ Ադրբեջանի գլխավոր դատախազությունը հայտարարել է, որ նա ձերբակալվել է։ Վագիֆ Խաչատրյանը, ըստ մեղադրանքի, իբր հանցավոր խումբ է ստեղծել, որը 1991թ. դեկտեմբերի 21-ին մասնակցել է Խոջալուի շրջանի Մեշալի գյուղի բնակիչների դեմ հանցագործություններին։