Էմմա Պողոսյանը դարձել է ծանրամարտի Եվրոպայի պատանեկան առաջնության արծաթե մեդալակիր

ԵՐԵՎԱՆ, 31 հուլիսի – Sputnik. Հայաստանի ներկայացուցիչ Էմմա Պողոսյանը դարձել է Ռումինայի մայրաքաղաք Բուխարեստում կայացած ծանրամարտի Եվրոպայի պատանեկան առաջնության արծաթե մեդալակիր: Տեղեկությունը հայտնում է ծանրամարտի Եվրոպայի ֆեդերացիան:

81 կգ քաշային ծանրորդուհիների մրցապայքարում մեր մարզուհին ցույց է տվել երկամարտի 221 կգ արդյունք: Էմմա Պողոսյանը պոկում և հրում վարժությունում դարձել է նաև արծաթե մեդալակիր:

Ավելի վաղ հայտնել էինք, որ առաջնության հաղթողի տիտղոսը նվաճել են 61 կգ քաշային Գառնիկ Չոլակյանը, 81 կգ քաշային Ռաֆիկ Հարությունյանը, 89 կգ քաշային Սուրեն Գրիգորյանը, իսկ 55 կգ քաշային Սեյրան Խուդանյանը և 61 կգ քաշային Մերուժան Եղոյանը դարձել են բրոնզե մեդալակիրներ: Երիտասարդական ԵԱ-ի փոխչեմպիոնի տիտղոսը նվաճել են Տիգրան Կարապետյանը (67 կգ), Գոռ Սահակյանը (73 կգ) և Կարեն Մարգարյանը (81 կգ): Մարտին Պողոսյանը (73 կգ), Մնացական Աբրահամյանը (81 կգ) և Ալեքսանդրա Գրիգորյանը (59 կգ) ևս դարձել են բրոնզե մեդալակիրներ։

Եվրոպայի երիտասարդական առաջնությունն անցկացվում է հուլիսի 23-ից օգոստոսի 3-ը Բուխարեստում:

Հայաստանի մինչև 20 տարեկանների հավաքականը Եվրոպայի առաջնությանը մասնակցում է 11 ծանրորդով, իսկ մինչև 23 տարեկանների հավաքականը՝ 10 մարզիկով։