ԵՐԵՎԱՆ, 29 հուլիսի – Sputnik. «Պարի ՆՆ»-ի հարձակվող և Ռուսաստանի պատանեկան և երիտասարդական հավաքականների նախկին խաղացող Էդգար Սևիկյանը պատրաստ է խաղալ Հայաստանի ֆուտբոլի հավաքականում: Նա այդ մասին ասել է Metaratings.ru–ին։
«Եթե առաջարկ լինի Հայաստանի ֆուտբոլի ֆեդերացիայից, սիրով կհամաձայնեմ։ Կցանկանայի խաղալ Հայաստանի հավաքականում։ Դիտել եմ վերջին հանդիպումները և ուրախ եմ թիմի արդյունքներից։ Դա շատ լավ է մեզ համար»,- ասել է Սևիկյանը:
Միաժամանակ ֆուտբոլիստը հայտնել է, որ ՀՖՖ–ի ներկայացուցիչներն իր հետ կապ չեն հաստատել։
Նշենք, որ Մոսկվայի «Լոկոմոտիվի» սան Էդգար Սևիկյանը հանդես է եկել Ռուսաստանի տարբեր տարիքային խմբերի պատանեկան հավաքականներում: Նա խաղացել է իսպանական «Լևանտեում»։
Նախորդ տարվա հունիսին տեղեկություն էր տարածվել, որ կիսապաշտպանը կարող է ստանալ Հայաստանի մարզական քաղաքացիություն: