ԵՐԵՎԱՆ, 27 հուլիսի – Sputnik. Հայաստանը բարեկամական երկրներից դեպի Ռուսաստան ծովամթերքի մատակարարների առաջին եռյակում է։ Այս մասին գրում է «Պրայմը»` վերլուծելով ՌԴ ձկնային արտադրանքի մատակարարումների վրա էմբարգոյի հետևանքները։
ՄԱԿ–ի Comtrade հարթակի տվյալներով` 2023 թվականի հունվար–ապրիլին ոչ բարեկամական երկրներից (այդ թվում` ԵՄ–ից, ԱՄՆ–ից և Նորվեգիայից) ձկնեղենից և ծովամթերքից պատրաստի արտադրանքի մատակարարումները դեպի Ռուսաստան կազմել են ընդամենը 2 մլն դոլար (շուկայի 8,5%-ը)։ Հիմնական մատակարարներն են եղել Իտալիան (ապրանք է մատակարարել 750 հազար դոլարի), Սլովենիան (570 հազար դոլար) և Լիտվան (226 հազար դոլար)։
Նույն ժամանակահատվածում բարեկամական երկրներից ձկան և ծովամթերքի մատակարարումները կազմել են 21,9 մլն դոլար։ Դրանց շարքում առաջատարը Չիլին է (15,2 մլն դոլար), Հնդկաստանը (4,6 մլն դոլար) և Հայաստանը (1,2 մլն դոլար)։
Միևնույն ժամանակ պարբերականի վերլուծաբանները կարծում են, որ էմբարգոն տեղ կազատի տեղական արտադրողների համար։
Ոչ բարեկամական երկրների և տարածքների թվում են` Ավստրալիան, Ալբանիան, Անդորան, Բահամյան կղզիները, Մեծ Բրիտանիան, ԵՄ պետությունները, Իսլանդիան, Կանադան, Լիխտենշտեյնը, Միկրոնեզիան, Մոնակոն, Նոր Զելանդիան, Նորվեգիան, Կորեայի Հանրապետությունը, Սան–Մարինոն, Հյուսիսային Մակեդոնիան, Սինգապուրը, ԱՄՆ–ն, Թայվանը (Չինաստան), Ուկրաինան, Չեռնոգորիան, Շվեյցարիան և Ճապոնիան։