ԵՐԵՎԱՆ, 27 հուլիսի – Sputnik. «Հանրային ձայն» կուսակցության ղեկավարներ՝ «Դոգ» մականունով հայտնի Վարդան Ղուկասյանը և Արտակ Գալստյանը հանցավոր կազմակերպություն են ստեղծել ։ Նրանց նկատմամբ քրեական վարույթ է նախաձեռնվել։ Այս մասին տեղեկանում ենք Քննչական կոմիտեի լրատվական ծառայությունից։
Նշվում է, որ 2021թ. կեսերին Ղուկասյանը և Գալստյանը ստեղծել և ղեկավարել են 10 անձից բաղկացած հանցավոր կազմակերպություն, որը անձանց և կազմակերպությունների վերաբերյալ արատավորող տեղեկությունները հրապարակելու սպառնալիքով գույքային միջոցներ կամ գույքի նկատմամբ իրավունքներ է ձեռք բերել, խարդախությամբ գումարներ է հափշտակել, զբաղվել է փողերի լվացմամբ, ինչպես նաեւ անհարգալից վերաբերմունք են ցուցաբերել դատավորների նկատմամբ:
«Քննության ներկա փուլում արդեն իսկ պարզվել են հանցավոր սխեմայով տարբեր անձանցից շանտաժի միջոցով շորթում կատարելու 4 դրված։ Այդ անձանցից պահանջվող գումարները կազմել են ընդհուպ մինչև 500 հազար ԱՄՆ դոլարին համարժեք դրամ կամ գույքային միջոցներ»,–ասված է հաղորդագրությունում։
Քննության տվյալներով ՝ Ղուկասյանն ու խմբավորման մյուս անդամները հավաքագրել, մշակել են տարբեր անձանց, այդ թվում ՝ իրավապահ մարմինների ղեկավարների և դատավորների վերաբերյալ տեղեկություններ և նյութեր, որպեսզի հնարավորություն ունենան ազդելու լուրջ սոցիալական և քաղաքական որոշումների կայացման վրա, վերահսկելու պետական մարմինների գործունեությունը:
Զբաղվածության պատրանք ստեղծելու և օրինական շահույթ ստանալու, ինչպես նաև հանցավոր կազմակերպության նպատակները թաքցնելու համար ստեղծվել է «Հանրային ձայն» կուսակցությունը, ինչպես նաև համանուն տաքսի և անվտանգության ծառայությունները:
«Քննությամբ նախնական տվյալներ են ձեռք բերվել նաև առերևույթ հանցավոր խմբավորման անդամներից մեկի կողմից պետական դավաճանություն կատարելու վերաբերյալ։ Այդ մասին նյութերը, քննության առարկա դարձնելու նպատակով, ուղարկվել են այլ նախաքննական մարմին», - նշված է Քննչական կոմիտեի հաղորդագրության մեջ։
Հիշեցնենք, որ մայիսի 25–ին մեղադրանք էր առաջադրվել Վարդան Ղուկասյանին, «Հանրային ձայն» կուսակցության ղեկավար Արտակ Գալստյանին, ինչպես նաև երկու այլ անձանց` խմբի կազմում քաղաքացի Տ․Ա․-ից (Տիգրան Արզաքանցյան– խմբ.) 53.806.500 դրամին համարժեք 110.000 դոլար գումար շորթելու համար։ Ղուկասյանը միջազգային հետախուզման մեջ է։