ԵՐԵՎԱՆ, 26 հուլիսի – Sputnik. Իրավապահները հայտնաբերել են Գեղարքունիքի մարզի Ներքին Գետաշեն գյուղի մատուռի մոտ պոլիէթիլենային տոպրակի մեջ նորածին տղա երեխային թողած կնոջը: Տեղեկությունը Sputnik Արմենիային հայտնեց ՀՀ քննչական կոմիտեի մամուլի պատասխանատու Գոռ Աբրահամյանը։
«Այս պահին քննչական գործողություններ են ընթանում, գործի շահերից ելնելով՝ այլ մանրամասներ չեմ կարող հայտնել»,–ասաց Աբրահամյանը։
Դեպքի վերաբերյալ MediaHub-ը` հղում անելով գյուղի բնակիչներից մեկին, գրել է, որ կինը ապրում է մատուռի հարևանությամբ, որդիների և թոռների հետ:
«Մեզ հասած տեղեկություններով, երբ վերջինիս հայտնաբերել են, նա ինքնախոսոտվանական ցուցմունք է տվել և ասել, որ ամաչել է իր տարիքում` 56 տարեկանում երեխա ունենալուց, քանի որ իր հետ ապրում են տղաներն ու թոռները: Դա է պատճառը, որ գնացել է այդ քայլին»,–գրում է կայքը:
Կայքի տեղեկություններով՝ կինը քննչականում հայտնել է, որ hղիության մասին ոչ ոք չի իմացել: Երեխան ծնվել է վաղաժամ՝ հղիության 6-րդ ամսում:
Հայտնել էինք, որ Գեղարքունիքի մարզի Ներքին Գետաշեն գյուղի «Սուրբ թաղ» թաղամասում՝ մատուռի հարևանությամբ, հուլիսի 22–ին նորածին երեխա է հայտնաբերվել դեղին պոլիէթիլենային տոպրակի մեջ։ Երեխան ծայրահեղ ծանր վիճակում, շնչական անբավարարությամբ ու ցնցումներով, ռեանիմոբիլով տեղափոխվել էր Երևանի «Մուրացան» համալսարանական հիվանդանոց, որտեղ մահացել էր։
Ներքի Գետաշեն գյուղի վարչական ղեկավար Ռուբեն Զուլոյանը Sputnik Արմենիայի հետ զրույցում ասել էր, որ Մատուռի մոտ տոպրակով թողնված նորածին տղային գյուղի շները քաշելով հասցրել են գյուղացիներից մեկի տան հետնամաս, որտեղ էլ գտել են նրան։