ԵՐԵՎԱՆ, 26 հուլիսի – Sputnik. Երևանի «Ալաշկերտ» ֆուտբոլային ակումբը պատրաստ է հունգարական «Դեբրեցենի» հետ Կոնֆերենցիաների լիգայի որակավորման երկրորդ փուլի խաղին։ Այս մասին նախախաղային ասուլիսի ժամանակ հայտարարել է «Ալաշկերտի» գլխավոր մարզիչ Վահե Գևորգյանը։
«Վերլուծել ենք մրցակցին, լավ թիմ է։ Մեր նախորդ մրցակիցն էլ էր լավը, բայց «Դեբրեցենը» կարգով ավելի բարձր ֆուտբոլիստներ ունի»,– ասել է նա։
Գևորգյանն ասել է, որ խաղադաշտում հանդիպելու են տարբեր խաղաոճ ունեցող թիմերով. «Դեբրեցենի» մարզիչը շատ է սիրում կոմբինացիոն և կարճ փոխանցումներով ֆուտբոլ։
Դա «Դեբրեցենի» մոտ շատ լավ է ստացվում, բայց «Ալաշկերտի» մարզիչը վստահեցրել է` իր թիմը գիտի մրցակցի խաղաոճը ու խաղային համակարգը։
«Մեր թիմում բոլորը թե՛ հոգեբանորեն, թե՛ ֆիզիկապես պատրաստ են վաղվա հանդիպմանը և հուսով եմ, որ կուրախացնենք հայ երկրպագուներին»,- ասել է
Նշենք, որ «Ալաշկերտ» – «Դեբրեցեն» հանդիպումը կկայանա Աբովյանի քաղաքային մարզադաշտում հուլիսի 27-ին` 19:00-ին:
Հիշեցնենք, որ Կոնֆերենցիաների լիգայի որակավորման առաջին փուլում Երևանի «Ալաշկերտը» մրցում էր Չեռնոգորիայի «Արսենալ-Տիվատի» դեմ։
Երևանյան թիմը նախ սեփական հարկի տակ ոչ– ոքի (1:1) խաղաց մրցակցի հետ, իսկ արտագնա խաղում հաղթեց 6։1 հաշվով։