ՀՀ ԱԳՆ–ում օտարերկրյա դեսպանների հետ քննարկվել է շրջափակված ԼՂ հումանիտար բեռի տեղափոխումը

ԵՐԵՎԱՆ, 26 հուլիսի – Sputnik. ՀՀ արտաքին գործերի նախարարությունում ՀՀ ԱԳ նախարարի տեղակալ Մնացական Սաֆարյանը հանդիպել է ՀՀ–ում հավատարմագրված դիվանագիտական ներկայացուցչությունների ղեկավարների և միջազգային կառույցների ներկայացուցիչների հետ և քննարկել շրջափակված Լեռնային Ղարաբաղ այսօր ուղարկված շուրջ 400 տոննա մարդասիրական օգնության հարցը։ Տեղեկությունը հայտնում է ՀՀ արտաքին գործերի նախարարության մամուլի ծառայությունը։

«ՀՀ ԱԳ նախարարի տեղակալը ներկայացրել է Ադրբեջանի կողմից Լաչինի միջանցքի ավելի քան 7 ամիս շարունակվող արգելափակման հետևանքով Լեռնային Ղարաբաղում ստեղծված հումանիտար ճգնաժամը»,– նշված է հաղորդագրության մեջ:

Մնացական Սաֆարյանն նշել է, որ հունիսի 15-ից Լեռնային Ղարաբաղի լիակատար շրջափակումը և հումանիտար մատակարարումների դադարեցումը, այդ թվում՝ Կարմիր խաչի միջազգային կոմիտեի միջոցով, հանգեցրել է պարենի, դեղորայքի, վառելիքի և կենսական նշանակության այլ ապրանքների սուր պակասի:

Հանդիպման ընթացքում կարևորվել է միջազգային հանրության հստակ ազդակն Ադրբեջանին՝ կատարելու ՄԱԿ արդարադատության միջազգային դատարանի փետրվարի 22-ի և հուլիսի 6-ի իրավաբանորեն պարտադիր ուժ ունեցող որոշումները՝ Լաչինի միջանցքով անձանց, տրանսպորտային միջոցների ու բեռների անխափան տեղաշարժը երկու ուղղություններով ապահովման վերաբերյալ:

Հանդիպման ավարտին դիվանագիտական ներկայացուցչությունների և միջազգային կառույցների ղեկավարները շրջայց են կատարել ԱԳՆ շենքի հարակից հատվածում կայանված հումանիտար շարասյան մոտ՝ ծանոթանալով հումանիտար բեռների խմբաքանակում ներառված ապրանքատեսակներին:

Հիշեցնենք, որ այսօր առաջին անհրաժեշտության 400 տոննա ապրանքով բեռնված 19 մեքենա Երևանից մեկնեց ավելի քան 225 օր շրջափակման մեջ գտնվող Արցախ։ Ներկա էին ՀՀ–ում հավատարմագրված դեսպանները։ Սյունիքի Կոռնիձորի հատվածից, ըստ պայմանավորվածության, բեռները Արցախ կհասցվեն ռուս խաղաղապահների ուղեկցությամբ։