ԵՐԵՎԱՆ, 25 հուլիսի - Sputnik. Ֆուտբոլի Հայաստանի փոխչեմպիոն Երևանի «Փյունիկի» կիսապաշտպան Միխայիլ Կովալենկոն, ինչպես նաև թիմի գլխավոր մարզիչ Ռոման Մոնարյովը չեն կարողանա մեկնել Շվեդիա՝ կոնֆերենցիաների լիգայի որակավորման երկրորդ փուլի հանդիպմանը մասնակցելու: Այս մասին «Чемпионат» պարբերականին հայտնել է երևանյան թիմի նախագահ Արթուր Սողոմոնյանը:
Հուլիսի 27-ին «Փյունիկը» որակավորման երկրորդ փուլում կհյուրընկալվի շվեդական «Կալմար» ակումբին:
Սողոմոնյանի խոսքով՝ ռուսաստանցիներ Կովալենկոյին և Մոնարյովին Երևանում Լեհաստանի դեսպանատանը շենգենյան վիզա չեն տրամադրել։
«Այո՛, մերոնց կրկին թույլ չտվեցին, քանի որ Հայաստանում շվեդական վիզաներ տրամադրում է Լեհաստանի դեսպանատունը։ Մենք դիմել ենք այլ դեսպանատներ, բայց նրանք ասացին, որ իրավունք չունեն։ Իսկ Լեհաստանի դեսպանատանը հրաժարվեցին ընդունել մեր ռուսաստանցիների փաստաթղթերը, քանի որ դա պետության քաղաքականությունն է»,-ասել է Սողոմոնյանը։
Հիշեցնենք, որ որակավորման առաջին փուլում Լիտվայի դեսպանությունը ռուսաստանցիներ Միխայիլ Կովալենկոյին, Ռոման Մոնարյովին, ինչպես նաև նիգերիացի Թեոֆիկ Ջիբրիլին վիզա չէր տրամադրել Էստոնիա մեկնելու համար, որտեղ Հայաստանի փոխչեմպիոնը պատասխան հանդիպում էր անցկացնում տեղի «Նարվա Տրանսի» հետ: