Ավտովթար Էջմիածին քաղաքում. ուղևորը մահացել է, վարորդը` հիվանդանոց տեղափոխվել

ԵՐԵՎԱՆ, 24 հուլիսի – Sputnik. Էջմիածին քաղաքի Արարատյան փողոցում «Օպել» մակնիշի ավտոմեքենան դուրս է եկել երթևեկելի գոտուց և բախվել կայանված «Վոլվո» մակնիշի ավտոմեքենային, որի հետևանքով կա մեկ զոհ, մեկ վիրավոր։ Տեղեկությունը հայտնում է ՆԳՆ ոստիկանության մամուլի ծառայությունը։

««Օպելի» 46-ամյա ուղևոր Բենիկ Ստեփանյանը մահացել է, իսկ 48-ամյա վարորդը` տեղափոխվել հիվանդանոց»,– նշված է հաղորդագրության մեջ:

Ինչպես հայտնում է ՆԳՆ փրկարար ծառայությունը, ՃՏՊ–ն տեղի է ունեցել հուլիսի 23-ին` մոտավորապես 23։30-ին։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:

Մինչ փրկարարների կանչի վայր հասնելը վարորդը ավտոմեքենայից դուրս է բերվել տեղի ուժերով և հոսպիտալացվել Էջմիածին քաղաքի ԲԿ։

Փրկարարները հոսանքազրկել են ավտոմեքենան ու փակել գազի բալոնի փականը:

Կատարվում է նախաքննություն: