ԵՐԵՎԱՆ, 24 հուլիս-Sputnik. Ավելի քան կես միլիոն քաղաքացի արդեն միացել են ՀՀ ԱԺ անկուսակցական պատգամավոր Թագուհի Թովմասյանի նախաձեռնած ստորագրահավաքին, որով նրանք հաստատում են, որ Արցախը չի կարող լինել Ադրբեջանի կազմում։ Այս մասին ԱԺ–ում հրավիրված ասուլիսի ժամանակ հայտարարեց Թագուհի Թովմասյանը։
«Ստորագրահավաքն իրականացրել ենք մայիսի 3-ից մինչև հուլիսի 20–ը, ու այս ընթացքում մեզ միացան 536 898 մարդ։ Այսքան մարդ իր ստորագրությամբ հաստատեց, որ հայ ժողովուրդը չի լիազորել Նիկոլ Փաշինյանին Արցախը թողնել Ադրբեջանին»,– ասաց նա։
Պատգամավորը վստահ է, որ եթե շարունակի ստորագրահավաքը, ապա կհավաքվեն միլիոնավոր ստորագրություններ։
Թագուհի Թովմասյանը նշում է նաև, որ եղել մարդիկ, ում կամավորները փողոցում ներկայացրել են ստորագրահավաքի նպատակը, սակայն ստացել են մերժում։ Այդ մարդկանց թիվն ընդամենը 120 է եղել։
«Եվս 5 մարդ հրաժարվել է ու ասել` Արցախի մասին թող մտածեն Սերժ Սարգսյանն ու Ռոբերտ Քոչարյանը»,– նշեց պատգամավորը։
Պատգամավորը հավելեց նաև, որ մտադիր է այս ստորագրությունների ցանկն ուղարկել բոլոր միջազգային կազմակերպություններին ու կառույցներին՝ հայ հասարակության իրական դիրքորոշումը ցույց տալու և Արցախի հարցով ՀՀ վարչապետ Փաշինյանի գործողությունների օրինականությունը վիճարկելու համար: