ԵՐԵՎԱՆ, 22 հուլիսի – Sputnik. Եթե Արցախի վերջնական հանձնման փաստաթուղթը ստորագրվի, Հայաստանը թևակոխելու է խոր անկայունության փուլ, որից դուրս գալը շատ դժվար է լինելու։ Ֆեյսբուքյան ուղիղ եթերի ժամանակ այս մասին ասաց ՀՀ նախկին արտգործանախարար Վարդան Օսկանյանը։ Նա վստահ է, որ հիմա արդեն այդ անկայունության ծիլերը տեսնում ենք, ներառյալ` քաղբանտարկյալների թվի աճը մեր երկրում։
«Եթե պատերազմից հետո Փաշինյանի անվտանգությունը կախված է իր պաշտոնից, այս փաստաթուղթը ստորագրելուց հետո Փաշինյանի անվտանգությունն ու իր պաշտոնը միաձուլվելու են, դառնալու են մեկ ամբողջություն, և այս պայմաններում երկրում չի կարող ժողովրդավարություն լինել»,– կարծում է Օսկանյանը։
Նա վստահ է, որ այս պարագայում երկրի ղեկավարը չի կարող ռացիոնալ լինել իր որոշումներում։
Օսկանյանի խոսքով` երբ ինքն այս մասին խոսում է արևմտյան դիվանագետների հետ, նրանք շատ արագ ընկալում են սպասվող լրջագույն խնդիրը։ Գիտակցում են` երբ ամեն կերպ աջակցում են նրան, որ դրանով մի րոպե առաջ ինչ–որ գեոպոլիտիկ խնդիր լուծեն մեր տարածաշրջանում, իրականում հեռանկարում ավելի մեծ վնաս են հասցնում Հայաստանին և ամբողջ տարածաշրջանին։
«Հայաստանի քաղաքական անկայունությունն ազդելու է նաև ընդհանրապես տարածաշրջանի խաղաղության և կայունության վրա»,– վստահ է ՀՀ նախկին արտգործնախարարը։
Նա պնդում է` բանակցային այլընտրանքային լուծման համար ընդամենը պետք է օրակարգ բերել այն հարցը, որ խորհրդային շրջանում Արցախն ունեցել է ինքնավար կարգավիճակ։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
Վերջին շրջանում հայ–ադրբեջանական բարձր մակարդակի հանդիպումներ են անցկացվել Վաշինգտոնում, Բրյուսելում, Մոսկվայում, Քիշնևում։
Ադրբեջանի նախագահ Իլհամ Ալիևը պարբերաբար հայտարարում է, որ խաղաղության պայմանագրի ստորագրման կարևոր պայմանը այսպես կոչված «Զանգեզուրի միջանցքի» բացումն է ու զինվորականների դուրսբերումը Լեռնային Ղարաբաղից։