ԵՐԵՎԱՆ, 22 հուլիսի – Sputnik. Հայաստանյան մի քանի բանկեր դադարեցնում են «Յունիստրիմ» համակարգի սպասարկումը, քանի որ ԱՄՆ իշխանությունները պատժամիջոցներ են սահմանել վճարային համակարգի դեմ։
«Յունիստրիմ» արագ դրամական փոխանցումների համակարգի հետ համագործակցության դադարեցման մասին հաղորդագրություններ են տարածել «Արդշինբանկը» և «Կոնվերս բանկը»։
Բանկերը հայցում են հաճախորդների ներողամտությունն ու առաջարկում գումար փոխանցելու կամ ստանալու համար օգտվել վճարային այլ համակարգերից։
Նշենք, որ ԱՄՆ նոր պատժամիջոցների մասին հայտնի է դարձել հուլիսի 20-ին։
«Յունիստրիմը» հանդես է գալիս որպես արտասահմանյան դրամական փոխանցումների օպերատոր շուրջ 30 երկրներում, որոնց թվում են Հունաստանը, Մեծ Բրիտանիան, Կիպրոսը, Իսրայելը, Սերբիան, Թուրքիան, Մոլդովան, Հայաստանը, Բելառուսը, Վրաստանը, Ղազախստանը, Ղրղզստանը, Տաջիկստանը, Ուզբեկստանը և այլն:
Համակարգի հետ համագործակցության դադարեցման մասին հայտարարել են նաև արտասահմանյան մի շարք բանկեր։