Երևանի սրտում` Զաքյան փողոցում, «Գարեջրի օրեր» փառատոնն է։ Այստեղ հայկական գարեջուր արտադրող տասնյակից ավելի ընկերություններ են ներկայացնում իրենց արտադրանքն ու գարեջրի պատրաստման տեխնոլոգիան։ Փառատոնի կազմակերպիչը
«ԷվենտՏուրա» ընկերությունն է։ Նպատակը Հայաստանն աշխարհին ներկայացնելն է որպես գարեջրի մշակույթ ունեցող և գարեջրի արտադրության մեջ առաջատար երկիր։
Փառատոնի այցելուների շարքում հիմնականում զբոսաշրջիկներ են, որոնք վայելում են Երևանն ու հայկական գարեջուրը։
«Ի՞նչ եք անում ձեր Մոսկվաներում, վեր կացեք, եկեք, ամբողջ Մոսկվան այստեղ է»,– տեսազանգով կազմակերպված փառատոնն էր ցույց տալիս հյուրերից մեկը Մոսկվայում գտնվող ընկերներին։
Գարեջուր Հայաստանում սկսել են պատրաստել դեռ հին ժամանակներում։ Քրիստոսից առաջ 5-րդ դարում հայկական գյուղերից մեկը կատարած այցելությունից հետո պատմիչ Քսենոփոնը գրել է, որ կավե կարասներում հայերը պահում են գարու գինի` երեսին լողացող գարեհատիկներով։
Նշենք, որ փառատոնն անցկացվում է երկու օր` հուլիսի 22-ին և 23-ին` ժամը 14։00-ից մինչև 22։30-ը։