«Հանրային ձայն» կուսակցության ղեկավար Արտակ Գալստյանի մեղադրանքի ծավալն ավելացել է

ԵՐԵՎԱՆ, 21 հուլիսի – Sputnik. ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում քննվող քրեական վարույթի շրջանակներում պարզվել են «Հանրային ձայն» կուսակցության ղեկավար Արտակ Գալստյանի կողմից առանձնապես խոշոր չափերի շորթում, խարդախություն և փողերի լվացում կատարելու դեպքերի նոր հանգամանքներ: Տեղեկությունը հայտնում է ՀՀ ՔԿ մամուլի ծառայությունը։

Մասնավորապես, «Հանրային ձայն» կուսակցության ղեկավար Արտակ Գալստյանը փաստաբանական գործունեությամբ զբաղվող ՍՊԸ հիմնադիր տնօրեն Ս. Սարգսյանի, Հ. Խաչատրյանի հետ նախնական համաձայնությամբ, 2021թ. ապրիլից մինչև 2023թ. մարտ ամիսն ընկած ժամանակահատվածում մի կնոջից խաբեությամբ մաս-մաս դրամական փոխանցման եղանակով ստացել են 5.122.150 ՀՀ դրամ։

Մեկ այլ գործով` համագործակցելով նույն փաստաբանական գործունեությամբ զբաղվող ՍՊ ընկերության հիմնադիր տնօրեն Ս. Սարգսյանի և Հ. Խաչատրյանի հետ, Գալստյանը խարդախությամբ Շ.Ա.-ից հափշտակել է 6.000.000 ՀՀ դրամ։ Այնուհետև հանցավոր սխեմայով` փողերի լվացման միջոցով, փորձել են կոծկել եկամուտները։

Ձեռք բերված նոր փաստերի հիման վրա Ա. Գալստյանին ներկայացված մեղադրանքը փոխվել է և նրան մեղադրանք ներկայացվել ՀՀ քրեական օրենսգրքի 258-րդ հոդվածի 3-րդ մասի 3-րդ կետով (շորթումը, որը կատարվել է առանձնապես խոշոր չափերով), 255-րդ հոդվածի 3-րդ մասի 3-րդ կետով (խարդախությունը, որը կատարվել է առանձնապես խոշոր չափերով ) և 296-րդ հոդվածի 3-րդ մասի 3-րդ կետով (փողերի լվացումը): Լրացվել են նաև նշված վարույթի շրջանակում մեղադրյալ հանդիսացող մի քանի այլ անձանց մեղադրանքները։

Նախաքննությունը շարունակվում է: