«Արարատ-Արմենիան» գերկամային հաղթանակ տարավ «Էգնատիայի» նկատմամբ

ԵՐԵՎԱՆ, 21 հուլիսի – Sputnik, Խաչիկ Չախոյան. Կոնֆերենցիաների լիգայի որակավորման առաջին փուլի պատասխան խաղում «Արարատ-Արմենիան» հաղթեց ալբանական «Էգնատիային»։ Դրամատիկ պայքարում ընթացած խաղում գրանցվեց 4։4 հաշիվը, ու 11–մետրանոց հարվածաշարում Վսեվոլոդ Երմակովի հիանալի խաղը հաղթանակ պարգևեց հայկական թիմին։

Երևանում կայացած խաղի վերջին վայրկյաններին հաղթանակը բաց թողնելուց հետո «Արարատ-Արմենիան» պետք է միայն հաղթեր երկրորդ փուլ դուրս գալու համար։ Սակայն պատասխան հանդիպումը շատ վատ սկսվեց մեր թիմի համար։ Ֆերնանդո Մեդեյրոսը գլխի հարվածով առաջ մղեց ալբանական թիմին և՛ այս խաղում, և՛ դիմակայությունում։ Սակայն հայկական ակումբը բավականին արագ հետ բերեց կորցրածը։ Տենտեն Յենեի փոխանցումից հետո Ուիլֆրեդ Էզան, դուրս գալով մեն-մենակ դարպասապահի դիմաց, վարպետորեն խփեց պատասխան գնդակը։ Ավելին` հայկական թիմը կարող էր առաջ անցնել հաշվի մեջ, բայց Տենտոն Յենեի հարվածը նպաստավոր դիրքից շեղ ստացվեց։

Բավականին հետաքրքիր ու լարված խաղ էր ընթանում։ «Արարատ-Արմենիան» շատ արագ կարողանում էր նետվել հակագրոհի ու անմիջապես սպառնում մրցակցի դարպասին։ «Էգնատիան» փորձում էր գնդակի երկար խաղարկումով գտնել դեպի մեր թիմի դարպասը տանող ճանապարհը։ Եվ այդ ճանապարհը դաշտի տերերը գտան` նորից հաղթելով «երկրորդ հարկում»։ Ռեդի Կասան մեր պաշտպանի հետ պայքարում հաղթող դուրս եկավ ու առաջ մղեց ալբանացիներին։ Նշենք, որ այս դրվագում հաջող չխաղաց նաև մեր դարպասապահ Վսեվոլոդ Երմակովը։ Առաջին խաղակեսն ավատվեց «Էգնատիայի» հաղթանակով՝ 2։1 հաշվով։

Երկրորդ խաղակեսում «Էգնատիան» ձգտում էր խաղալ ըստ հաշվի` հիմնականում մտածելով պաշտպանության մասին։ Գնդակին ավելի շատ էին տիրում «Արարատ-Արմենիայի» ֆուտբոլիստները։ Բայց ռեալ գոլային պահ ստեղծել չէր հաջողվում։ Սակայն 58-րդ րոպեին հայկական թիմը հասավ իր նպատակին։ «Արարատ-Արմենիայի» նորեկ Ադրիանու Կաշտանյերային հաջողվեց միջին տարածությունից խփել պատասխան երկրորդ գնդակը։ Իսկ 65-րդ րոպեին Ուիլֆրիդ Էզան պարզապես պարտավոր էր առաջ մղել «Արարատ-Արմենիային»։ Բայց մեր հարձակվողը աններելի կերպով չօգտագործեց իր հնարավորությունը։ Դիմակայությունում հաղթողին որոշելու համար նշանակվեց լրացուցիչ ժամանակ։

Երբ լրացուցիչ երկրորդ խաղակեսի ընթացքում «Էգնատիան» երրորդ անգամ առաջ անցավ հաշվի մեջ, թվաց` «Արարատ-Արմենիան» այլևս ուժ չի ունենա պատասխան գնդակ խփելու։ Բայց մեր ֆուտբոլիստները իրենց մեջ ուժ գտան, և Տենտոն Յենեն նորից վերականգնեց հաշվի հավասարությունը։ Ավելին` մեր տղաները կամային մեծ որակներ դրսևորելով` նաև առաջ անցան հաշվի մեջ խաղի 113-րդ րոպեին Բուենոյի խփած գոլից հետո։ Բայց սա էլ դեռ խաղի վերջը չէր, քանի որ մրցավարի կողմից ավելացված խաղաժամանակում ալբանացիները նորից վերականգնեցին հաշվի հավասարությունը՝ 4։4։

11–մետրանոց հարվածաշարում հերոսացավ Վսեվոլոդ Երմակովը, որը երկու անգամ հետ մղեց նշակետից կատարված հարվածը։ Իսկ «Արարատ-Արմենիային» հաղթանակ բերեց Տենտոն Յենեի իրացրած 11–մետրանոցը։

Կոնֆերենցիաների լիգայի որակավորման երկրորդ փուլում «Արարատ-Արմենիան» մրցելու է հունական «Արիսի» հետ։ Առաջին խաղը տեղի կունենա Հայաստանում՝ հուլիսի 27-ին, իսկ պատասխան խաղը` Հունաստանում օգոստոսի 3-ին։