ԵՐԵՎԱՆ, 20 հուլիսի – Sputnik. Հայաստանի բուհերն այս տարի ունեցել են 13304 դիմորդ, որոնցից 9147–ը ընդունվել են։ Այս մասին այսօր ՀՀ կառավարության նիստում հայտարարել է ԿԳՄՍ նախարար Ժաննա Անդրեասյանը, հայտնում են ԿԳՄՍՆ-ից։
Նա նշել է, որ այս ցուցանիշները համադրելի են նախորդ տարվա ցուցանիշների հետ։
Անվճար տեղերն այս տարի եղել են 2128, որից 1782-ը համալրվել է, սա ընդունվածների 83,7 տոկոսն է։ Վճարովի տեղերն այս տարի 15984 են, որից 7242-ը համալրվել է։
«Սա շատ ցածր ցուցանիշ է՝ 45,3 տոկոս: Ընդ որում՝ այս թվի մեջ մտնում են թե՛ պետական, թե՛ ոչ պետական բուհերը: Ոչ պետական բուհերին հատկացվել է ավելի քան 3700 տեղ, որից շուրջ 3 տոկոսն է ընդունվել, այսինքն՝ գրեթե ընդունելություն չի եղել, որն էլ իր ազդեցությունն է ունենում ցածր ցուցանիշի վրա»,– ասել է Ժաննա Անդրեասյանը։
Նա մտահոգիչ է համարել հատկապես Ագրարային համալսարանի ընդունելության ցուցանիշները, որտեղ հիմնական փուլով ընդամենը 7 տոկոս է։
Ավելի վաղ Sputnik Արմենիայի հետ զրույցում նախարարը ասել էր, որ Ագրարային համալսարանը բավականին լուրջ աշխատանք ունի անելու, որպեսզի դիմորդների թիվն ավելանա։
Նիստի ժամանակ ՀՀ վարչապետ Նիկոլ Փաշինյանն ընդգծել էր՝ բուհական համակարգը խորը համակարգային և բովանդակային ճգնաժամի մեջ է, և ՀՀ կառավարության պարտքն է՝ այն հաղթահարել։
ԿԳՄՍ նախարարաը տեղեկացրել է նաև, որ հուլիսի 19-ից մեկնարկել է լրացուցիչ փուլը։ Այն դիմորդները, որոնք դուրս են մնացել հիմնական փուլի մրցույթից, հնարավորություն ունեն մասնակցելու թափուր տեղերի մրցույթին: