ԵՐԵՎԱՆ, 20 հուլիսի – Sputnik. Բելառուս զինվորականները մեկ շաբաթվա ընթացքում «Վագներ» խմբի մարտիկների հետ ուսումնամարտական խնդիրներ կմշակեն Լեհաստանի սահմանի մոտ։ Տեղեկությունը հայտնում է ՌԻԱ Նովոստին՝ հղում անելով Բելառուսի ՊՆ մամուլի ծառայությանը։
«Բելառուսի զինված ուժերը շարունակում են համատեղ մարզումները «Վագներ» ՄՌԿ-ի մարտիկների հետ։ Մեկ շաբաթվա ընթացքում հատուկ գործողությունների ուժերի ստորաբաժանումներն ընկերության ներկայացուցիչների հետ համատեղ ուսումնամարտական խնդիրներ կմշակեն «Բրեստսկի» զորավարժարանում», - նշված է նախարարության տելեգրամյան ալիքում հրապարակված հաղորդագրության մեջ:
Ավելի վաղ Բելառուսի պաշտպանության նախարարությունը հայտնել էր, որ «Վագների» ղեկավարության հետ մշակվել է ճանապարհային քարտեզ՝ մոտ ապագայում տարբեր զորատեսակների ստորաբաժանումների միջև փորձի փոխանակման համար:
Մինչ այդ՝ հուլիսին, նախարարությունը տեղեկացրել էր, որ «Վագներ» խմբի մարտիկները հրահանգիչներ են եղել Մոգիլևի մարզի Օսիպովիչի քաղաքի մոտակայքում տարածքային պաշտպանության ստորաբաժանումների պարապմունքներին։
Հիշեցնենք` հունիսի 23–ի լույս 24–ի գիշերը «Վագներ» մասնավոր ռազմական կազմակերպության ուժերը Դոնի Ռոստովում գրավեցին Հարավային ռազմական օկրուգի շտաբը։ Դա տեղի ունեցավ Եվգենի Պրիգոժինի այն հայտարարության ֆոնին, թե իբր ՌԴ ԶՈւ–ն հրթիռառումբային հարվածներ է հասցրել «Վագների» ճամբարներին, ինչը հերքեց և՛ ՊՆ–ն, և՛ ԱԴԾ–ն։ Պրիգոժինի դեմ զինված ապստամբություն կազմակերպելու հոդվածով քրեական գործ հարուցվեց։
Ավելի ուշ Բելառուսի նախագահի մամուլի ծառայությունը հայտարարեց, որ Ալեքսանդր Լուկաշենկոն բանակցել է Պրիգոժինի հետ, և նա ընդունել է Ռուսաստանի տարածքում «Վագների» շարժը դադարեցնելու առաջարկը: Դրանից հետո ՌԴ նախագահի մամուլի քարտուղար Դմիտրի Պեսկովը հայտնեց, որ «Վագների» ղեկավարը կմեկնի Բելառուս, իսկ քրեական գործը կկարճվի։