ԵՐԵՎԱՆ, 20 հուլիսի – Sputnik. ԵՄ–ն պատժամիջոցներ է սահմանել Իրանի 5 քաղաքացու նկատմամբ` մեղադրելով նրանց Ռուսաստանին անօդաչուներ մատակարարելուն առնչություն ունենալու մեջ։ Այս մասին տեղեկանում ենք ԵՄ–ի պաշտոնական ամսագրում զետեղված փաստաթղթերից։
Եվրոպական սահմանափակումները, մասնավորապես, կիրառվել են Qods Aviation–ի տնօրենների խորհրդի անդամ Համիդ Ռեզա Շարիֆի Թեհրանիի, Իսլամական հեղափոխության պահապանների կորպուս նավատորմի հրամանատար Ալի Ռեզա Թանգսիրիի, ինչպես նաև Paravar Pars Company–ի տնօրենների խորհրդի 3 անդամների դեմ։
Բրյուսելի կարծիքով` այդ մարդիկ են պատասխանատու Ուկրաինայի տարածքային ամբողջականությանը, ինքնիշխանությանն ու անկախությանը սպառնացող գործողությունների համար։
Պատժամիջոցային ցանկում հայտնվածների ակտիվները ԵՄ–ում ենթակա են սառեցման, բացի այդ, ցանկի ֆիզանձանց արգելված են ուղևորությունները դեպի ԵՄ–ի երկրներ։
Արևմուտքի երկրները պնդում են, որ Ուկրաինայում ընթացող մարտական գործողությունների համար Իրանն իբր անօդաչուներ է մատակարարում Ռուսաստանին։ Մոսկվան և Թեհրանը նման մեղադրանքները բազմիցս հերքել են։ Իրանի արտգործնախարար Հոսեյն Ամիր Աբդոլահիանը հայտարարել է, որ Թեհրանը ՌԴ–ին մատակարարել է անօդաչուներ, բայց Ուկրաինայում ռազմական հատուկ գործողությունների մեկնարկից մի քանի ամիս առաջ։