ԵՐԵՎԱՆ, 17 հուլիսի – Sputnik. Թուրքիայի նախագահ Ռեջեփ Թայիփ Էրդողանը մտադիր է ՌԴ նախագահ Վլադիմիր Պուտինի հետ քննարկել հացահատիկային գործարքի շարունակությունը: Նա այդ մասին հայտարարել է Ստամբուլի օդանավակայանում Պարսից ծոցի երկրներ շրջագայության մեկնելուց առաջ։
Այսօրվանից գործարքը դադարեցվել է, սակայն ՌԴ նախագահի մամուլի քարտուղար Դմիտրի Պեսկովը հայտարարել է` Ռուսաստանն անհապաղ կվերադառնա դրա իրականացմանը, երբ գործարքի՝ ՌԴ–ին առնչվող հատվածն իրականացվի։
«Այդ նախաձեռնությունը, որը շուտով կդառնար մեկ տարեկան, այդ պահից պատմության մեջ մտավ որպես դիվանագիտական հաղթանակ։ Նախաձեռնության շրջանակում մատակարարվել է ավելի քան 33 միլիոն տոննա արտադրանք։ Դրա շնորհիվ կանխվեց պարենային ճգնաժամը բազմաթիվ աղքատ երկրներում»,-հայտարարել է Թուրքիայի նախագահը։
Էրդողանն ավելացրել է` հավատում է, որ իր բարեկամ նախագահ Պուտինը ցանկանում է շարունակել իրականացնել այդ մարդասիրական կամուրջը:
«Հուսով եմ, որ այս հարցը և բազմաթիվ այլ հարցեր քննարկելու հնարավորություն կընձեռվի օգոստոսին մեր երկրում Պուտինի հետ անձնական հանդիպման ժամանակ»,- ասել է Թուրքայի նախագահը։
Սևծովյան հացահատիկային նախաձեռնությունը, որը 2022 թվականի հուլիսի 22-ին ստորագրեցին Ռուսաստանի, Թուրքիայի, Ուկրաինայի և ՄԱԿ-ի ներկայացուցիչները, ենթադրում է ուկրաինական հացահատիկի, պարենի և պարարտանյութերի արտահանումը Սև ծովով երեք նավահանգիստներից` ներառյալ Օդեսան։ Նավերի տեղաշարժի համաձայնեցմամբ զբաղվում է Ստամբուլում տեղակայված Համատեղ համակարգող կենտրոնը։
Հացահատիկային նախաձեռնությունը փաթեթային պայմանավորվածության բաղկացուցիչ մաս է կազմում։ Երկրորդ մասը՝ Ռուսաստան-ՄԱԿ հուշագիրը, որը նախատեսված է երեք տարվա համար, նախատեսում է Ռուսաստանից պարենի և պարարտանյութերի արտահանման ապաշրջափակում, հիմնական խնդիրների թվում նշվում է «Ռոսսելխոզբանկի» վերամիավորումը SWIFT-ին, գյուղատնտեսական տեխնիկայի, պահեստամասերի և սպասարկման մատակարարումների վերսկսումը, «Տոլյատի-Օդեսա» ամոնիակատարի աշխատանքի վերականգնումը և մի շարք այլ միջոցառումներ:
Մոսկվայում նշում են, որ փաթեթային պայմանավորվածության այդ մասը մինչ օրս չի կատարվել։