ԵՐԵՎԱՆ, 17 հուլիսի – Sputnik. Արցախի նախագահ Արայիկ Հարությունյանը միանում է Ստեփանակերտի Վերածնունդի հրապարակի նստացույց անողներին։ Այս մասին նա ասաց այսօրվա իր ուղերձում, գրում է «Արմենպրեսը»։
Նա նշեց, որ այս ծայրահեղ քայլին դիմում է, քանի որ վիճակն օրհասական է և ոչինչ չի մնում անելու, քանի որ միջազգային հանրությունը միայն բարի խոսքերով է սահմանափակվում և գործուն քայլեր չի իրականացնում։
«Սա լրացուցիչ ճիգ ու ահազանգ է միջազգային հանրության գործնական ուշադրությունը գրավելու, հորդորելու միջազգային հանրությանը կատարել իր ստանձնած պարտավորությունները, մղելու հայ ժողովրդին և մեր բոլոր բարեկամներին ակտիվ ու անհապաղ գործողությունների»,–ասաց Հարությունյանը։
Արցախի նախագահը Ստեփանակերտի հրապարակի վրանում
Նա նշեց, որ այս նստացույցով ակնկալում են, որ Հայաստանը, Ռուսաստանը, ԱՄՆ–ն, Ֆրանսիան, ԵՄ–ն, ՄԱԿ–ի անվտանգության խորհուրդն ու այլ լիազոր մարմիններ զերծ կմնան Ադրբեջանի հետագա ագրեսիվ, հանցավոր քայլերը խրախուսելուց և կկատարեն իրենց պարտավորությունները նոյեմբերի 9–ի եռակողմ հայտարարության, ՄԱԿ–ի արդարադատության միջազգային դատարանի հրամանների և միջազգային այլ ակտերի ու պայմանավորվածությունների պատշաճ կատարման ուղղությամբ։
Դիմելով Հայաստանի ու սփյուռքի հայերին` Հարությունյանը խնդրեց դիմել հնարավոր բոլոր միջոցներին` որոշում կայացնողների ուշադրությունը հրավիրելու և Արցախին աջակցող գործնական քայլեր կատարելու ուղղությամբ։
Նա ողջունեց վերջին օրերին Հայաստանում մեկնարկած համաժողովրդական շարժումը և նշեց, որ շարժման զարգացմանն են սպասում բոլոր արցախցիները։
Հարությունյանը նշեց, որ եթե առաջիկա մեկ շաբաթում ոչինչ չփոխվի, իրենք կդիմեն ավելի կտրուկ քայլերի, ինչպես Արցախում, այնպես էլ Արցախից դուրս։
Նշենք, որ հուլիսի 14–ից Ստեփանակերտի Վերածննդի հրապարակում մեկնարկել է համաժողովրդական շարժումը, որի մասին հուլիսի 13–ի ուշ երեկոյան հայտարարել էր Արցախի պետնախարար Գուրգեն Ներսիսյանը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։