ԵՐԵՎԱՆ, 14 հուլիսի – Sputnik. Վարդավառի տոնական միջոցառումներով պայմանավորված ՆԳՆ փրկարար ծառայությունն իրականացնելու է ուժեղացված ծառայություն։ Տեղեկությունը հայտնում են ՆԳՆ փրկակար ծառայությունից։
«Հուլիսի 16-ին ՆԳՆ փրկարար ծառայությունը՝ «Վարդավառի» տոնական միջոցառումներով պայմանավորված, Երևան քաղաքից դուրս եկող, ինչպես նաև դեպի Երևան քաղաք միջպետական ավտոճանապարհներին ու անտառամերձ ճանապարհներին ծավալելու է ժամանակավոր փրկարարական հենակետեր և իրականացնելու է ուժեղացված ծառայություն»,–նշված է հաղորդագրության մեջ։
Բացի այդ, ուժեղացված ծառայություն կիրականացվի Գեղարքունիքի մարզի Շողակաթ բնակավայրի Սևանա լճի ափամերձ գոտում, ինչպես նաև Սևանի հատուկ ջրափրկարարական ջոկատի կողմից՝ հանրային №1, №2, №3 լողափերում։
ՆԳՆ փրկակար ծառայությունը քաղաքացիներին հորդորում է պահպանել անվտանգության կանոնները, լինել զգոն և ջրային տարածքներում հետևել փրկարարների հրահանգներին, անտառամերձ և բուսածածկ հատվածներում պահպանել հրդեհային անվտանգության կանոնները՝ չվառել խարույկներ, չնետել այրված լուցկի, չմարված ծխախոտի մնացորդ, արևով լուսավորվող բացատներում չթողնել շշեր, ապակու կտորներ, քանի որ դրանք կարող են ֆոկուսացնել ճառագայթներն ու դառնալ հրդեհի առաջացման պատճառ։