ԵՐԵՎԱՆ, 14 հուլիսի – Sputnik. Արցախի հերոս, Արցախի անվտանգության խորհրդի նախկին քարտուղար Վիտալի Բալասանյանը ձերբակալվել է իշխանության ներկայացուցչի նկատմամբ բռնություն գործադրելու կասկածանքով։ Տեղեկությունը ֆեյսբուքյան իր էջում հայտնել է Վիտալի Բալասանյանի իրավունքների և օրինական շահերի պաշտպանությունը ստանձնած փաստաբան Ռաֆայել Մարտիրոսյանը։
Ավելի վաղ հայտնել էինք, որ Արցախում ձերբակալել են Վիտալի Բալասանյանին, նրա որդուն և քեռորդուն: Ըստ տեղեկությունների` գեներալին ձերբակալել են Ասկերանի իր տանը։ Մինչ այդ 40 րոպե խուզարկություն են իրականացրել Բալասանյանի տանը։
«Բալասանյանի նկատմամբ հարուցվել է քրեական գործ Արցախի Հանրապետության Քրեական օրենսգրքի 337 հոդվածի 1-ին մասի կասկածանքով (իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ)»,– նշել է փաստաբանը:
Մարտիրոսյանի խոսքով` Վիտալի Բալասանյանի մարմնի վրա առկա են բազմաթիվ վնասվածքներ։
Արցախի Հանրապետության գլխավոր դատախազությունն էլ հայտարարություն է տարածել Վիտալի Բալասանյանի որդու նկատմամբ հարուցված քրեական գործի մասին։
Ըստ գերատեսչության` Ասկերան քաղաքի բնակիչ Ա. Բ.-ին (Վիտալի Բալասանյանի որդուն. խմբ.) ԱՀ գյուղի և գյուղատնտեսության աջակցության հիմնադրամից նպատակային փոխառության պայմանագրով տրամադրվել է 74.500.000 դրամ փոխառություն՝ մեղվաընտանիքներ ձեռք բերելու նպատակով։
«Մինչդեռ փոխառու Ա..Բ.-ի կողմից նպատակային փոխառության պայմանագրով տրամադրված գումարը օգտագործվել է ոչ նպատակային, դրանք չեն ուղղվել պայմանագրի պարտադիր պայման հանդիսացող մեղվաընտանիքների ձեռք բերմանը, ինչի հետևանքով պետությանը պատճառվել է խոշոր վնաս»,– նշված է հաղորդագրությունում։
ԱՀ քրեական օրենսգրքի 199-րդ հոդվածի 1-ին մասով (վարկը ոչ նպատակային օգտագործելը) հարուցվել է քրեական գործ:
Նշվում է, որ գործի մինչդատական քրեական վարույթի օրինականության նկատմամբ հսկողությունը և դատավարական ղեկավարումն իրականացնում է ԱՀ գլխավոր դատախազության կոռուպցիոն, սեփականության, տնտեսական գործունեության և պետական ծառայության դեմ ուղղված հանցագործությունների գործերով բաժինը:
Հիշեցնենք` 2023թ–ի փետրվարի 14–ին հայտնի դարձավ, որ Արցախում քրեական գործ է հարուցվել Արցախի Անվտանգության խորհրդի նախկին քարտուղար Վիտալի Բալասանյանի դեմ։ Քրեական գործն առնչվում է Բալասանյանի պաշտոնավարման ժամանակահատվածում արձանագրված չարաշահումներին։