ԵՐԵՎԱՆ, 14 հուլիսի – Sputnik. Եթե Ադրբեջանը կրկին կրակահերթ արձակի անզեն բանվորերի ուղղությամբ, Երասխում կառուցվող երկաթի ձուլման գործարանի սեփականատեր ամերիկյան ընկերությունները դա կդիտարկեն ուղիղ հարված ամերիկյան կապիտալի ուղղությամբ։ Այս մասին ասվում է «Վիրտուալ ֆոնդինգ» և «ՍԻԷՍԻ գլոբալ ինվեսթմենթս» ընկերություններիտարածած հայտարարության մեջ։
Նշվում է, որ Ադրբեջանի գործողությունները ոչ թե բնապահպանական շարժառիթ ունեն, այլ զուտ քաղաքական որոշում են։
«Մենք գործողություններ ենք իրականացնելու միջազգային իրավական հարթակներում, որոնց համար մենք չենք խնայի որևէ միջոց և պահանջելու ենք կատարված ներդրումների, կրած վնասների և չստացված օգուտների հատուցում: Ընդգծենք, որ մենք ունենք բոլոր հիմքերն, այդ թվում՝ արձանագրված շուրջ 40 երկրների դիվանագիտական ներկայացուցիչների կողմից», ասված է հաղորդագրությունում։
Երասխում կառուցվող երկաթի ձուլման գործարանի սեփականատեր ամերիկյան ընկերություններնիրենց հայտարարությունում կեղծ են որակել այն պնդումները, որ Երասխում կառուցվող գործարանը էկոլոգիական խնդիր է ստեղծելու Ադրբեջանի համար:
Նրանք բացատրել են, որ գործարանը ոչ թե մետալուրգիական է, որտեղ հանքաքարից մետաղ են արտազատում, այլ մետաղաձուլարան է, որտեղ պատրաստի մետաղները ձուլելու արդյուքում վերածվում են ամրանների:
«Այս պարագայում չկան վնասակար արտանետումներ ո՛չ դեպի մթնոլորտ, ո՛չ դեպի շրջակա միջավայր ու պոչամբար: Թափոններ նույնպես չկան: Նմանատիպ գործարան այժմ աշխատում է նաև Ադրբեջանի մայրաքաղաքում՝ «Բաքու սթիլ քոմփանի» անվամբ, որը տարեկան 4 անգամ ավել երկաթ է ձուլում, քան նախատեսվում է ձուլել մեր գործարանում,և գտնվում է բնակելի տներից 400 մետր հեռավորության վրա»,– ասված է հաղորդագրությունում։
Նրանք նշել են նաև, որ Երասխ համայնքի բնակելի տները գտնվում են գործարանից շուրջ 300 մետր հեռավորության վրա, իսկ ադրբեջանական ամենամոտ Հեյդարաբադ գյուղը՝ 1.8 կմ հեռավորության վրա: Հետևաբար, Ադրբեջանի համար բնապահպանական խնդիր ստեղծելու նպատակ այստեղ չի կարող լինել:
Ասվում է նաև, որ գործարանն աշխատելու է ջրային հովացման համակարգով, որտեղ օգտագործվող ջուրը ներքին շրջապտույտի մեջ է և երբեք դուրս չի գալիս գործարանի տարածքից:
«Մեր գործարանի վառարանի ծխնելույզն ունենալու է 33 մետր բարձրություն և եռաստիճան ֆիլտրման համակարգ, որի միջոցով բարձրացող օդը չի ունենալու շրջակա միջավայրի վրա բացասական ազդեցություն»,– ասված է հաղորդագրությունում։
Ընկերությունները հայտնում են, որ վերոհիշյալ պնդումներն ապացուցելու համար նրանք պատրաստ են աշխատանքային կարգով քննարկել միջազգային փորձագետների հետ ինչպես առերես հանդիպման, այնպես էլ հեռահար ձևաչափերով:
Հիշեցնենք` հունիսի 13-ից ադրբեջանական կողմը պարբերաբար կրակում է Երասխում կառուցվող մետալուրգիական ձեռնարկության ուղղությամբ։ Հունիսի 14-ին տեղի ունեցած հրաձգության հետևանքով հաստատությունում աշխատող երկու հնդիկ է վիրավորվել։
Չնայած այս ամենին` Երասխում կառուցվող գործարանի շինհրապարակում հունիսի 20–ին բարձրացվել են Հայաստանի և Ամերիկայի Միացյալ Նահանգների դրոշները։
Ավելի վաղ` հուլիսի 7–ին, մետալուրգիական գործարանը կառուցող «Ջի Թի Բի Սթիլ» ընկերության տնօրեն Տիրան Հակոբյանը Sputnik Արմենիային հայտնել էր, որ գործարանի աշխատանքը կաթվածահար վիճակում է։