ԵՐԵՎԱՆ, 13 հուլիսի - Sputnik. Ռուսաստանը կարող է դադարեցնել իր մասնակցությունը հացահատիկային գործարքին, քանի դեռ չեն կատարվել այդ պայմանավորվածությունների վերաբերյալ տրված բոլոր խոստումները։ Այս մասին «Ռոսիա-24» հեռուստաալիքի եթերում հայտարարել է ՌԴ նախագահ Վլադիմիր Պուտինը։
«Մենք կարող ենք կասեցնել մեր մասնակցությունն այդ գործարքին։ Եվ եթե բոլորը հերթական անգամ ասում են, որ մեզ տրված բոլոր խոստումները կատարվելու են, դե թող կատարեն այդ խոստումները։ Եվ մենք անմիջապես կմիանանք այդ գործարքին»,-ասել է նա։
Պուտինը նշել է նաև, որ ՄԱԿ-ի գլխավոր քարտուղար Անտոնիո Գուտերեշը և կազմակերպության աշխատակիցներն անկեղծորեն ջանում են, որպեսզի արևմտյան երկրները սկսեն կատարել հացահատիկային գործարքի այն պայմանները, որոնք վերաբերում են Ռուսաստանին:
Սևծովյան հացահատիկային նախաձեռնությունը, որը 2022 թվականի հուլիսի 22-ին ստորագրել են Ռուսաստանի, Թուրքիայի, Ուկրաինայի և ՄԱԿ-ի ներկայացուցիչները, ենթադրում է ուկրաինական հացահատիկի, պարենի և պարարտանյութերի արտահանումը Սև ծովով երեք նավահանգիստներից, ներառյալ Օդեսան։ Նավերի տեղաշարժի համաձայնեցմամբ զբաղվում է Ստամբուլում տեղակայված Համատեղ համակարգող կենտրոնը։
Հացահատիկային նախաձեռնությունը փաթեթային պայմանավորվածության բաղկացուցիչ մաս է կազմում։ Երկրորդ մասը՝ Ռուսաստան-ՄԱԿ հուշագիրը, որը նախատեսված է երեք տարվա համար, նախատեսում է Ռուսաստանից պարենի և պարարտանյութերի արտահանման ապաշրջափակում, հիմնական խնդիրների թվում նշվում է «Ռոսսելխոզբանկի» վերամիացումը SWIFT-ին, գյուղատնտեսական տեխնիկայի, պահեստամասերի և սպասարկման մատակարարումների վերսկսումը, «Տոլյատի-Օդեսա» ամոնիակատարի աշխատանքի վերականգնումը և մի շարք այլ միջոցառումներ:
Մոսկվայում նշում են, որ փաթեթային պայմանավորվածության այդ մասը մինչ օրս չի կատարվում։