ԵՐԵՎԱՆ, 13 հուլիսի – Sputnik. Արցախում ձերբակալել են Վիտալի Բալասանյանին, նրա որդուն և քեռորդուն: Տեղեկությունը հայտնում է Aravot.am–ը։
Նշվում է, որ գեներալին ձերբակալել են Ասկերանի իր տանը, ցուցադրական՝ դիմակավորված, ձեռքերը ոլորելով: Մինչ այդ 40 րոպե խուզարկություն են իրականացրել Բալասանյանի տանը։
«Ձերբակալելուց հետո նրան տարել են ԱԱԾ, այժմ դատախազությունում է»,–գրում է թերթը։
2023թ–ի փետրվարի 14–ին հայտնի դարձավ, որ Արցախում քրեական գործ էր հարուցվել Արցախի Անվտանգության խորհրդի նախկին քարտուղար Վիտալի Բալասանյանի դեմ։ Քրեական գործն առնչվում էր Բալասանյանի պաշտոնավարման ժամանակահատվածում արձանագրված չարաշահումներին։
Նշենք, որ այսօր Արցախի պետնախարար Գուրգեն Ներսիսյանը հայտարարել է հուլիսի 14–ից համաժողովրդական անժամկետ շարժում սկսելու մասին։ Նա բոլորին հրավիրե է Ստեփանակերտի Վերածննդի հրապարակ, որտեղ միասնաբար կորոշեն հետագա անելիքները:
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։