ԵՐԵՎԱՆ, 12 հուլիսի – Sputnik. Երևանի Տիտոգրադյան փողոցի տներից մեկում 22-ամյա երիտասարդը խեղդամահ է արել 44-ամյա տանտիրոջը։ Տեղեկությունը հայտնում է ՀՀ ՆԳՆ ոստիկանության մամուլի ծառայությունը։
Մասնավորապես, ոստիկանության Էրեբունու բաժնի քրեական հետախույզները, իրացնելով օպերատիվ տվյալները և ձեռնարկելով օպերատիվ-հետախուզական միջոցառումներ՝ հուլիսի 12-ին, ժամը 13.35-ին, Երևանի Տիտոգրադյան փողոցի հասցեներից մեկում հայտնաբերել, սպանություն կատարելու հիմնավոր կասկածանքով ձերբակալել և բաժին են տեղափոխել Երկաթուղայինների 7-րդ փողոցի 22-ամյա մի բնակչի:
«Պարզվել է, որ 22-ամյա երիտասարդը հուլիսի 11-ին, ժամը 00.30-ի սահմաններում, Երկաթուղայինների 7-րդ փողոցի տներից մեկում տեղի ունեցած վիճաբանության ժամանակ արդուկի մալուխը պարանոցին փաթաթելով՝ խեղդամահ է արել տանտիրոջը՝ 44-ամյա Վահան Եղյանին, ապա դիակը թաքցրել է պահարանում»,–նշված է հաղորդագրության մեջ:
Դեպքի վայր է մեկնել օպերատիվ-քննչական խումբ: Քննչական գործողության ընթացքում հյուրասենյակի զգեստապահարանում հայտնաբերվել է 44-ամյա տղամարդու դիակը՝ արդուկի մալուխը պարանոցին փաթաթած:
Սպանության փաստով քրեական վարույթ է նախաձեռնվել: