ԵՐԵՎԱՆ, 11 հուլիսի – Sputnik. Թագուհի Թովմասյանի պաշտոնանկության գլխավոր շարժառիթը վրեժխնդրությունն է։ Այսօր Ազգային ժողովում լրագրողների հետ ճեպազրույցում ասաց «Պատիվ ունեմ» խմբակցության քարտուղար Տիգրան Աբրահամյանը։
«Երկրորդ շարժառիթն այն է, որ մարդու իրավունքների պաշտպանի գործունեության տեսանկյունից բոլոր փուլերում Թագուհի Թովմասյանն իր գործունեությամբ շատ ավելի ակտիվ է եղել, ավելի արդյունավետ, թիրախային է աշխատել` վեր հանելով բազմաթիվ խնդիրներ բոլոր ոլորտներին վերաբերող։ Թագուհի Թովմասյանը նաև բավականին մեծ աշխատանք է տանում մարդու իրավունքների համատեքստում Արցախի հարցում, հատկապես` շրջափակման շրջանակներում, ինչը նաև խնդրահարույց է իշխանության քաղաքական կուրսի տեսանկյունից»,– նշեց Աբրահամյանը։
Նրա խոսքով` Հայաստանում բռնապետական ռեժիմ կառուցելու և կայացնելու ճանապարհին կարծես թե նմանօրինակ ապօրինությունները սովորական են դարձել։ Նա ցավով նկատեց, որ վերջին 5 տարվա կտրվածքով երբ գործընթացին հետևում ենք, տեսնում ենք` հասարակության համար էլ, կարծես թե, հակասահմանադրական այս գործողությունները սովորական են դարձել։
Ինչ վերաբերում է Թագուհի Թովմասյանի դեմ սկսված գործընթացին, Աբրահամյանն այն հիմնազուրկ ու չփաստարկված անվանեց։
Շեշտեց` իրենց խմբակցությունը ևս հանձնաժողովի նախագահի պաշտոնում նոր թեկնածու չի առաջադրելու։
Նշենք, որ ԱԺ–ն քննարկում է Թագուհի Թովմասյանի` որպես ԱԺ մարդու իրավունքների և հանրային հարցերի մշտական հանձնաժողովի նախագահի լիազորությունները դադարեցնելու մասին ՔՊ ներկայացրած նախագիծը։ ՔՊ պատգամավոր, նախագծի հիմնական զեկուցող Հովիկ Աղազարյան վստահեցրել է, որ պատրաստ են քննարկելու ընդդիմադիր խմբակցությունների կողմից ներկայացված ցանկացած թեկնածություն։