ԵՐԵՎԱՆ, 11 հուլիսի – Sputnik. Տարածաշրջանային նշանակության գիտական գերհամակարգիչը Հայաստանում կբացվի մինչև տարեվերջ։ Տեղեկությունը Sputnik Արմենիայի թղթակցին հայտնեց հանրապետության Գիտությունների ազգային ակադեմիայի ինֆորմատիկայի և ավտոմատացման պրոբլեմների ինստիտուտի տնօրեն, տեխնիկական գիտությունների դոկտոր Հրաչյա Ասցատրյանը։ Համակարգիչը ստեղծել է ֆրանսիական Atos ընկերությունը, որն աշխարհում մեծ հզորությամբ համակարգիչներ արտադրող խոշորագույն ընկերություններից է։
Ֆրանսիայի հետ համագործակցությունը ինֆորմատիկայի ԳՀԻ-ն առաջին տարին չէ, որ իրականացնում է. Թուլուզի ինֆորմատիկայի հետազոտական ինստիտուտի (IRIT) հետ ակադեմիական փոխանակման ծրագիր է գործում:
Համագործակցության շրջանակում հայկական կողմը նվեր է ստացել համակարգիչ, որը նախկինում օգտագործվել է Թուլուզի Airbus արտադրական համալիրի օբյեկտներից մեկում: Հայաստանում աշխատելու համար գերհամակարգիչը «ափդեյթ» է անցել Atos-ում, որտեղ այն մի քանի անգամ հզորացվել է։
Գերհամակարգչի բլոկներն արդեն Հայաստանում են, մնում է ֆրանսիացի մասնագետների օգնությամբ հավաքել դրանք, ինչպես նաև ավարտել նոր հաշվողական կենտրոնի շենքի շինարարությունը:
Համակարգիչն աշխատում է 26 հազար բարձր հզորության պրոցեսորներով (համեմատության համար նշենք, որ ամենաժամանակակից անհատական համակարգիչներում հազվադեպ է ավելի քան 16 պրոցեսոր օգտագործվում):
«Մենք ունենք հաշվողական ռեսուրսներ, որոնց վրա աշխատում ենք, բայց դրանք անհամատեղելի են սպասվող համակարգչի հետ։ ԱՊՀ տարածքում նման մակարդակի հաշվողական մեքենաներ միայն Ռուսաստանում կան», - Sputnik Արմենիայի հետ զրույցում նշեց Հրաչյա Ասցատրյանը։
Նոր համակարգչի օգնությամբ հնարավոր կլինի ժամանակակից հետազոտություններ անցկացնել «մեծ տվյալների» (big data), արհեստական բանականության, պատկերների մշակման վերաբերյալ: Հաշվարկների հարցումներ են ստացվել հայաստանյան բուհերի և գիտահետազոտական ինստիտուտների շուրջ 40 հետազոտական թիմերից (քանի որ տեսական հաշվարկների մեծ զանգվածների կարիք ունեն ոչ միայն մաթեմատիկոսները, այլև բնական գիտությունների մասնագետները):