ԵՐԵՎԱՆ, 11 հուլիսի – Sputnik. ՆԱՏՕ-ի երկրների ղեկավարները հաստատել են Ուկրաինային բազմամյա աջակցություն տրամադրելու փաթեթը: Այս հայտարարությունն արել է դաշինքի գլխավոր քարտուղար Յենս Ստոլտենբերգը՝ ամփոփելով Վիլնյուսում Ուկրաինայի շուրջ քննարկման արդյունքները: Նրա խոսքը մեջբերում է ՌԻԱ Նովոստին։
«Սա երեք տարրից բաղկացած փաթեթ է։ Նախ դա ՆԱՏՕ-ի հետ համատեղելիության հասնելու բազմամյա աջակցության ծրագիրն է, ՆԱՏՕ-Ուկրաինա խորհրդի ստեղծումը։ Բացի այդ, առաջնորդները հաստատել են, որ Ուկրաինան ՆԱՏՕ-ի անդամ կդառնա, երբ դաշնակիցները որոշեն, որ պայմանները պահպանված են: Ուկրաինայի համար կչեղարկվի նաև անդամակցության գործողությունների ծրագրի կատարման պայմանը, ինչը կնվազեցնի անդամակցության գործընթացը` երկու փուլից հասցնելով մեկի», - ասել է նա։
ՆԱՏՕ-ի երկրների գագաթնաժողովը մեկնարկել է հուլիսի 11-ին և կշարունակվի նաև վաղը: ՆԱՏՕ-ի գլխավոր քարտուղարը վերջին ամիսներին ընդգծում էր, որ դաշնակիցներն աննախադեպ միասնականություն են դրսևորում բոլոր առանցքային հարցերի շուրջ, սակայն, ինչպես ինքը խոստովանեց հանդիպման նախօրեին, երկրները մինչև վերջին պահը շարունակում էին համաձայնեցնել ամփոփիչ հայտարարության տեքստը, որը վերաբերում է այնպիսի առանցքային հարցի, ինչպիսին են դաշինքին Ուկրաինայի անդամակցության հեռանկարները, Կիևին ուղղված աջակցությունն ու անվտանգության երաշխիքները: