ԵՐԵՎԱՆ, 10 հուլիսի - Sputnik. Հունգարիան Ադրբեջանի հետ գազի գնման պայմանագիր է կնքել չսպասելով, որ ԵՄ-ն գումար հատկացնի Բալկաններում ենթակառուցվածքների զարգացման համար: Այս մասին հայտարարել է Հունգարիայի ԱԳ նախարար Պետեր Սիյարտոն։
Նրա խոսքով` Հունգարիայի համար Ադրբեջանը «դիվերսիֆիկացիայի առավել ակնհայտ աղբյուրներից մեկն է», սակայն Հարավ–Արևելյան Եվրոպայի գազատարների համակարգը թույլ չի տալիս իրականացնել մատակարարումների մեծ ծավալներ:
«Մենք իզուր խնդրեցինք ԵՄ-ին օգնել մեզ` ընդլայնելու ցանցը. բրյուսելցի բյուրոկրատներն ուշադրություն չդարձրին` չնայած անընդհատ պահանջում են գազ գնել նոր աղբյուրներից։ Մենք անհրաժեշտ բոլոր պայմանագրերը կնքել ենք մեր ադրբեջանցի ընկերների հետ, որոնք այս տարի կսկսեն բնական գազ մատակարարել Հունգարիային՝ մինչև տարեվերջ 100 մլն խմ ծավալով», - գրել է Սիյարտոն սոցցանցում։
Նա նաև հավելել է, որ Բուդապեշտն ու Բաքուն «մոտ են 50 մլն խմ գազ պահուստավորելու մասին պայմանագիր կնքելուն»:
Ավելի վաղ հունգարական MVM CEEnergy էներգաընկերությունը և ադրբեջանական SOCAR նավթագազային ընկերությունը համաձայնագիր էին ստորագրել, որով մինչև 2023 թվականի վերջը Հունգարիա կմատակարարվի 100 մլն խմ գազ։ Երկարաժամկետ հեռանկարում մատակարարումների ծավալը տարեկան կավելանա մինչև 2 մլրդ խմ: