ԵՐԵՎԱՆ, 6 հուլիսի – Sputnik. Խորհրդային հայտնի կոմպոզիտոր Դավիթ Թուխմանովի թոռնուհին՝ արվեստաբանության թեկնածու, խմբավար, դաշնակահարուհի Զոյա Թուխմանովան Երևանում ներկայացրել է կոմպոզիտոր Պասկալ (Հարություն) Սինանյանի աշխատանքների ալբոմն ու ստեղծագործությունների ժողովածուն։
Նախագծի վրա Թուխմանովան աշխատել է 2019 թվականից։ Մասնավորապես, նա Սուրբ Ղազար կղզում ուսումնասիրել է Մխիթարյան միաբանության արխիվները, որտեղ պահվում էին Եվրոպայում հայտնի, իսկ Հայաստանում քիչ հայտնի կոմպոզիտորի ստեղծագործությունները։
Զոյա Թուխմանովա
Ուսումնասիրությունները դժվարացնում էր հիմնականում այն, որ կոմպոզիտորի մասին տեղեկությունները ներկայացված են արևելահայերենով, որին արվեստագետը չի տիրապետում։
«Պասկալ Սինանյանը հայկական Շոպենն է։ 2011 թվականին առաջին համերգը տվեցի, որն ամբողջությամբ բաղկացած էր Սինանյանի գործերից, և նրա ստեղծագործությունները երկրորդ կյանք ստացան», – պատմում է դաշնակահարուհին։
Թուխմանովան խոստովանել է, որ կցանկանար նրա ստեղծագործությունները ներկայացնել Հայաստանում սիմֆոնիկ նվագախմբի հետ, սակայն մինչ այս որոշել է նրա մասին հայ հանդիսատեսին պատմել ալբոմի և ստեղծագործությունների նոտաները հավաքելու միջոցով։
«Դրանք որոշել եմ ներկայացնել հենց Հայաստանում, քանի որ այն իմ սրտում է։ Մայրս Թուխմանովա է (խոսում է հայերեն– խմբ.), և արյան կանչն ինձն հայրենիք բերեց ինչպես 2013 թվականին, երբ ես աշխատում էի որպես խմբավար, այնպես էլ այսօր», – ասում է երաժիշտը։
Նա հավելում է, որ շատ է սիրում հայկական մշակույթը, մեծ հաճույքով ուսումնասիրել է լեզուն և կարողանում է տոլմա պատրաստել։ Խոստովանում է, որ իր ընտանիքում բոլորը «հիվանդ» են Հայաստանի հանդեպ սիրով, և ինքը հազվադեպ, բայց երբեմն փորձում է հայերեն խոսել պապի հետ, ում շատ ներամփոփ մարդ է համարում, և կրկնում է իր սիրած երկու հայկական բառերը` «Մասիս սար»։
Նշենք, որ Պասկալ (Հարություն) Սինանյանը ծնվել է 1939 թվականին Կոստանդնուպոլսում` առաջին հայկական սիմֆոնիկ նվագախմբի հիմնադիր Գրիգոր Սինանյանի ընտանիքում։ Պասկալ Սինանյանը ջութակ, երգեհոն, դաշնամուր էր նվագում, եղել է կոմպոզիտոր և դիրիժոր։ Ապրել է Ֆրանսիայում և Թուրքիայում։