ԵՐԵՎԱՆ, 4 հուլիսի – Sputnik. Արցախի իշխանությունները մի տեղ ունեն դիմելու` Հայաստանի ղեկավարությանը, Նիկոլ Փաշինյանին։ Այս մասին լրագրողների հետ զրույցում ասաց ՀՀ նախկին արտգործնախարար Վարդան Օսկանյանը` անդրադառնալով Արցախի նախագահ Արայիկ Հարությունյանի` Ռուսաստանի նախագահ Վլադիմիր Պուտինին դիմելուն։
Ավելի վաղ հայտնի էր դարձել, որ Արցախի իշխանությունը նամակ է ուղղել Վլադիմիր Պուտինին, որում ներկայացվել է Արցախի ու այնտեղ ապրող ժողովրդի ծանրագույն վիճակը։ Նշվել է, որ արցախցիների մեծամասնությունը հավատացել է ոչ թե Հայաստանի ղեկավարին, այլ Ռուսաստանի նախագահ Պուտինի խոսքերին, որ Արցախում հայերը ապրելու են անվտանգ ու արժանապատիվ։
«Արցախի իշխանությունները կարող են դիմել Պուտինին, Բայդենին (ԱՄՆ նախագահին,–խմբ.), դա որևէ արդյունք չի տալու, այդ մարդիկ ոչինչ չեն կարող անել այնքան ժամանակ, քանի դեռ ՀՀ իշխանություններն ասում են` Արցախը Ադրբեջան է։ Ուստի Արայիկ Հարությունյանը մի տեղ ունի դիմելու` ՀՀ ղեկավարին»,–ասաց Օսկանյանը։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին։
Մինչ այդ` 2022 թվականի փետրվարի 22-ին, Արդարադատության միջազգային դատարանը Ադրբեջանի նկատմամբ հրատապ միջոց կիրառեց` պարտադրելով ապաշրջափակել Լաչինի ճանապարհը։ Այս որոշումը ոչ միայն չկիրառվեց, այլև ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։
Հունիսի 15-ի առավոտյան՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ կատարեցին՝ ՀՀ տարածքում դրոշ տեղադրելու նպատակով։ Հայկական կողմի ձեռնարկած միջոցների արդյունքում ադրբեջանցի զինծառայողների առաջխաղացման փորձը կանխվեց։