ԵՐԵՎԱՆ, 3 հուլիսի – Sputnik. Երևանի քաղաքապետարանը վերսկսում է քաղաքացիների ընդունելությունը։ Երևանի քաղաքապետարանի գործակարգավարական նիստի ժամանակ տեղեկությունը հայտնեց Երևանի փոխքաղաքապետ Տիգրան Ավինյանը։
«Հաստատվել է քաղաքապետարանում քաղաքացիների ընդունելության նոր կարգը։ Այսուհետ բոլոր այն քաղաքացիները, որոնք մերժումներ են ստացել իրենց դիմումների կապակցությամբ, հնարավորություն են ունենալու անձամբ պարզաբանումներ ստանալ ստորաբաժանումների ղեկավարներից»,-ասաց նա:
Ավինյանի խոսքով՝ յուրաքանչյուր հինգշաբթի երևանցիներին կընդունեն քաղաքապետարանում։
«Քաղաքացիների մոտ շատ-շատ հարցեր են կուտակվում այն դեպքում, երբ նրանց դիմումները մերժվում են»,- ասաց նա։
Փոխքաղաքապետը հիշեցրեց, որ քաղաքապետարանում քաղաքացիների ընդունելությունը դադարեցվել էր կորոնավիրուսային համավարակի պատճառով։ Մինչդեռ վարչական շրջաններում քաղաքացիների ընդունելությունը չի դադարեցվել, այն միշտ եղել է։