ԵՐԵՎԱՆ, 3 հուլիսի – Sputnik. Եվրասիական զարգացման բանկը (ԵԱԶԲ) 26 մլն դոլար կտրամադրի Հրազդան ՋԷԿ–ում նոր էներգաբլոկ կառուցելու համար։ Այս մասին հայտնում է բանկի մամուլի ծառայությունը։
Համապատասխան վարկային պայմանագիրը ստորագրվել է H Energy Solutions ընկերության հետ («Տաշիր» ընկերությունների խումբ)։
Էներգաբլոկի հզարությունը կկազմի 50 ՄՎտ, ինչը թույլ կտա տարեկան շուրջ 400 մլն կՎտ/ժ էլեկտրաէներգիա արտադրել։
Հաղորդագրության մեջ նշվում է, որ շինարարության շրջանակում միջազգային բնապահպանական չափորոշիչներին համապատասխանող բարձրարդյունավետության ժամանակակից սարքավորում կօգտագործվի, ինչը կնպաստի շրջակա միջավայրի պաշտպանությանը։
Նախագծի շրջանակում արտադրվող էլեկտրաէներգիան ոչ միայն Հայաստանի էլեկտրաէներգիայի ազատ մրցունակ շուկա կմատակարարվի, այլև կարտահանվի։
Նախագծի իրականացումը թույլ կտա Հայաստանում ուժեղացնել գեներացման դիվերսիֆիկացիան և բարձրացնել դրա արդյունավետությունը։
Կայանը նախատեսում են շահագործման հանձնել 2024 թվականի կեսերին։
Սա «Տաշիր» ընկերությունների խմբի հետ ԵԱԶԲ–ի կողմից Հայաստանում իրականացվող երկրորդ նախագիծն է էներգետիկ անվտանգության բարձրացման ոլորտում։ 2022 թվականի օգոստոսին պայմանավորվածություն է ձեռք բերվել կառավարման միջազգային ստանդարտների և ավտոմատացված հաշվառման համակարգերի ներդրման ծրագրի շրջանակում բանկի կողմից ենթակառուցվածքի արդիականացման և հաշվառքի սարքերի արտադրության ֆինանսավորելու վերաբերյալ։
Այդ նպատակով ԵԱԶԲ–ն վարկային պայմանագրի շրջանակում 30 մլն դոլար է ուղղում։ Նախագծի շրջանակում Երևանում էլեկտրաէներգիայի սպառման հաշվառքի սարքերի արտադրության ընդլայնում է կլինի։
Ավելի վաղ ԵԱԶԲ–ի վարչության փոխնախագահ Դենիս Իլյինը հայտնել էր, որ Հայաստանում բանկի ներդրումների ծավալը 2023 թվականին շուրջ 100 մլն դոլար կկազմի։