ԵՐԵՎԱՆ, 2 հուլիսի – Sputnik. Ուկրաինան ակնկալում է Արժույթի միջազգային հիմնադրամից (ԱՄՀ) մինչև 2023 թվականի վերջ ստանալ ևս մոտ 1 միլիարդ դոլար, ասել է տնտեսագետ և Ուկրաինայի նախագահ Վլադիմիր Զելենսկու խորհրդական Օլեգ Ուստենկոն։
«Ամբողջ ծրագիրը կազմում է 15 միլիարդ դոլարից մի փոքր ավելի, որը նախատեսված է 4 տարվա համար։ Առաջին տարում հաշվարկը կազմում է 5 միլիարդ դոլար։ Միջոցների մի մասը մենք արդեն ստացել ենք անմիջապես, երբ ծրագիրը սկսվել է։ Այժմ ևս 1 մլրդ դոլար մենք կարող ենք մինչև տարեվերջ ստանալ», - ասել է Ուստենկոն «Ռադա» հեռուստաալիքի եթերում։
Նա հիշեցրել է, որ 2023 թվականին Ուկրաինայի պետական բյուջեի դեֆիցիտը կազմել է գրեթե 40 միլիարդ դոլար, որից ավելի քան 18 միլիարդ դոլարը փակվել է ԵՄ-ի, մոտ 10 միլիարդ դոլար՝ ԱՄՆ-ի և մոտ 5 միլիարդ դոլարը՝ ԱՄՀ-ի կողմից։
Ավելի վաղ ԱՄՀ-ն հայտարարել էր, որ կազմակերպության գործադիր խորհուրդն ավարտել է Ուկրաինային ֆինանսական օգնության ծրագրի առաջին վերանայումը ՝ Կիևին 900 մլն դոլարի չափով տրանշ վճարելու համար:
Մարտին ԱՄՀ-ն Ուկրաինայի հետ 4 տարով 15,6 մլրդ դոլար վարկային ծրագրի շուրջ համաձայնություն է ձեռք բերել։